Read Изге Язма, 2015 Гыйбрәтле сүзләр 25 Bible Online

Гыйбрәтле сүзләр 25 - Изге Язма, 2015 bible

Гыйбрәтле сүзләр 25

¹Болары да Сөләйман патшаның гыйбрәтле сүзләре; аларны Яһүдә патшасы Хизәкыйянең кешеләре җыеп калдырган.

²Аллаһының даны — эш-гамәлне сер итеп тоту, патшаларның даны — һәр эшне тикшереп, аның асылын ачу.

³Күк һәм диңгез тирәнлекләрендәге серләрне белеп булмаган кебек, патшалар күңелендәге уйларны да белеп булмас.

⁴Көмешне мәгъдәннән [6] аер, һәм көмешче аннан гүзәл савыт ясый алыр;

⁵яман бәндәне патшадан читләштерсәң, тәхет идарәсендә гаделлек ныгыр.

⁶Патша алдында үзеңне эре тотма һәм дәрәҗәле түрәләрнең урынын алырга тырышма.

⁷Чөнки берәүнең сиңа дәрәҗәле кеше алдында: «Урыныңны менә аңа бир дә түбәнгә төшеп утыр», — дип әйтүенә караганда түрәң алдында: «Менә монда, түргәрәк күчеп утыр», — дип әйтүләрен ишетү яхшырак булыр.

⁸Дәгъва эшен ашыгып башлама; югыйсә ахырда көндәшең җиңеп рисвайга калсаң нишләрсең?

⁹Әгәр якын кешең белән низагка керсәң, башка берәүнең серен чишмә,

¹⁰югыйсә бүтәннәр, ишетеп, сине хур итәрләр һәм гомерлек рисвайга калдырырлар.

¹¹Әдәпле әйтелгән сүз ялтыравык көмеш савыттагы алтын алма кебек.

¹²Алтын алка һәм саф алтыннан ясалган муенса ничек булса, зирәк кешенең шелтәсе дә игътибарлы колакка шулай булыр.

¹³Кызу урак өстендә салкын су кешеләрне ничек сөендерсә, ышанычлы илче дә үзен юллаган хуҗасының җанын шулай шатландырыр.

¹⁴Бүләк бирмәсә дә, бирдем дип мактанучы алдакчы кеше кысыр болыт яки җил белән бер үк.

¹⁵Сабырлык түрәне дә мәрхәмәтле булырга мәҗбүр итә; һәм татлы сүз сөякләрне җылыта.

¹⁶Бал таптыңмы? Туйганчы аша, әмма арттырып җибәрмә, юкса кире чыгарырсың.

¹⁷Дустыңның өенә еш барып йөрмә, юкса, синнән туеп, бөтенләй күрәлмый башлар.

¹⁸Үзенең якынына ялган шаһитлык биргән кеше авыр чүкеч, үткен кылыч һәм очлы ук кебектер.

¹⁹Афәт көнендә ышанычсыз кешегә өмет баглау сынган тешкә һәм хәлсез аякка өмет баглау белән бер.

²⁰Күңеле боек кешегә җыр җырлау салкын көндә берәүнең киемен салдыру яки ачык җәрәхәткә серкә сибү белән бер.

²¹Дошманың ач булса, аңа икмәгеңне бир, әгәр сусаган булса — су эчер.

²²Бу игелегеңне эшләп, син аның башына утлы күмер өясең; Раббы сиңа әҗерен Үзе бирер.

²³Төньяк җиле яңгыр китерер, юха тел йөзне бозар.

²⁴Холыксыз хатын белән яшәүгә караганда түбәнең бер почмагында яшәү хәерлерәк.

²⁵Сусаган җанга салкын су ничек булса, ерак илдән килгән яхшы хәбәр дә шулай.

²⁶Болганчык чишмә һәм бозылган кизләү ничек булса, явызлар алдында баш бирүче тәкъва кеше дә шулай.

²⁷Күп бал ашау яхшы булмаган кебек, дан өстенә дан казанырга омтылу да яхшы түгел.

²⁸Үзенең рухы-җанына хуҗа була алмаган кеше диварлары җимерелгән шәһәр кебек.