Read Изге Язма, 2015 Гыйбрәтле сүзләр 26 Bible Online

Гыйбрәтле сүзләр 26 - Изге Язма, 2015 bible

Гыйбрәтле сүзләр 26

¹Җәен — кар, урак өстендә яңгыр яхшы булмаган кебек, ахмак өчен хөрмәт тә яхшы түгел.

²Чыпчык — пырылдап, карлыгач томырылып очып киткән кебек, нахак ләгънәт тә кешегә кунмас.

³Ат өчен — камчы, ишәк өчен — йөгән һәм ахмак өчен таяк яхшы.

⁴Ахмакның ахмак соравына ахмакларча җавап кайтарма, югыйсә үзең дә шул ахмакка охшап калырсың.

⁵Ахмак үзенә акыллы булып күренмәсен өчен, аның ахмак соравына ахмак җавап кайтар.

⁶Ахмак кешегә йомыш кушучы үзенең аякларын кисәр һәм бәла-казага дучар булыр.

⁷Аксакның аяклары тигез атламаган кебек, ахмаклар авызында гыйбрәтле сүзләр дә шулай аксый.

⁸Ахмакка хөрмәт күрсәтүче кеше ташаткыч корал көпшәсенә таш салырга маташучы кеше белән бер.

⁹Исерекнең кулында чәнечкеле күгән ботагы ничек булса, ахмаклар авызында да гыйбрәтле сүзләр шундыйдыр.

¹⁰Ахмакны яки очраклы үтеп баручыны яллаган кеше һәр җан иясен яралаучы дуамал укчы белән бер.

¹¹Үз косыгына әйләнеп кайткан эт кебек, ахмак та үзенең ахмаклыгына кат-кат әйләнеп кайтыр.

¹²Үзен зирәк дип санаучы кешене күргәнең бармы? Иң акылсыз кеше дә үзен зирәк дип санаучы кешедән өметлерәк.

¹³Ялкау кеше: «Юлда арыслан бар! Мәйданда арыслан йөри!» — дип, урамга чыкмас.

¹⁴Ишек — үзенең тупсасында, ялкау исә үзенең ятагында әйләнер.

¹⁵Ялкау кеше тустаганны кулына алыр, әмма аны авызына китереп җиткерергә иренер.

¹⁶Ялкау үзен акыллы җавап бирүче җиде зирәкнең җидесеннән дә зирәгрәк дип уйлар.

¹⁷Башкалар низагына тыгылу урам этенең колагыннан эләктереп алу белән бер.

¹⁸ 18-19 Үзенең дустын алдап та: «Мин моны мәзәк өчен генә эшләдем», — дип акланучы бәндә утлы кисәү, уклар атып, үлем чәчеп йөрүче акылдан язган кеше белән бер.

²⁰Утын бетсә, ут сүнәр; гайбәтче булмаган җирдә гауга тынар.

²¹Күмер — кызулык өчен, утын — учак өчен, ә дуамал кеше — гауганы кыздыру өчен.

²²Гайбәтченең сүзләре татлы ризык кебек, алар карынның иң тирән урыннарына үтеп керәләр.

²³Ялкынлы тел белән мәкерле күңел көмеш йөгертелгән балчык савыт кебек.

²⁴Дошман кешенең авызы бер нәрсә сөйли, ә күңелендә икенче нәрсә — мәкер ята.

²⁵Ул ягымлы тавыш белән сөйләсә дә, аңа ышанма; аның йөрәгендә җиде кабахәтлекнең җидесе дә бар.

²⁶Бергә-бер очрашканда, мәкерен яшерсә дә, халык җыенында аның бөтен явызлыклары ачылыр.

²⁷Башкаларга баз казыган кеше үзе шул базга егылып төшәр; югарыга таш тәгәрәткәннең ташы аның үз башына кире төшәр.

²⁸Ялган телле кеше үзе хәкарәт иткәннәрне дошман күрә; ялагай тел һәлакәткә илтә.