Read Изге Язма, 2015 Гыйбрәтле сүзләр 27 Bible Online

Гыйбрәтле сүзләр 27 - Изге Язма, 2015 bible

Гыйбрәтле сүзләр 27

¹Иртәгәге көн белән мактанма, чөнки ул көннең нәрсә китерәсен белмисең.

²Үз-үзеңне түгел, бәлки башка кеше, үз телең түгел, бәлки чит кеше теле мактасын.

³Таш та авыр, ком да авыр, әмма ахмак кешенең рәнҗетүе аларның икесеннән дә авыррак.

⁴Ачу — рәхимсез, ярсу — тыелгысыз, әмма көнчелеккә кем каршы тора алыр?!

⁵Ачыктан-ачык шелтә сүзе яшерен мәхәббәттән хәерлерәк.

⁶Дус ясаган яралар — тугрыдыр; дошманның үбүе — ялган үбүдер.

⁷Тук җан кәрәзле балны да кире кагар, ә ач җанга ачы нәрсә дә татлы тоелыр.

⁸Оясын ташлап киткән кош үзен ничек сизсә, торган урынын ташлап киткән кеше дә үзен шулай хис итәр.

⁹Ислемай һәм хуш исләр йөрәккә хозурлык бирә; дусның ихлас киңәше дә күңелгә шулай хозур тоелыр.

¹⁰Үз дустыңны да, атаң дустын да ташлама; бәхетсезлек килгәндә, ярдәм эзләп, ерактагы туганың өенә барма; ерактагы туганнан якындагы күршең яхшырак.

¹¹И углым, зирәк бул һәм минем йөрәгемне сөендер; шулчак мин гаепләүчеләремә тиешле җавапны бирә алырмын.

¹²Акыллы кеше бәлане алдан күрер һәм аңардан яшеренә белер, ә тәҗрибәсезләр туп-туры бәла эченә барып керерләр дә михнәткә дучар булырлар.

¹³Чит-ят кеше өчен үз өстенә җаваплылык алучының киемен алаласың — аны үзеңдә рәһен итеп калдырырга була.

¹⁴Таң иртәдән дустын кычкырып мактаган кеше аңа ләгънәт укыгандай булыр.

¹⁵Яңгырлы көндә туктаусыз тамчылап торган су белән холыксыз хатын — икесе бер-беренә тиң.

¹⁶Андый хатынны тыеп тору җилне бәйдә тоту яки учыңда зәйтүн маен тотарга тырышу белән бердер.

¹⁷Тимер тимерне кайрар, кеше үз дустының уй-фикерен чарлар.

¹⁸Инҗир агачын карап үстерүче аның җимешен дә ашар; хуҗасын саклап торучы үзе дә хөрмәт казаныр.

¹⁹Су өстендә йөз чагылып күренгән кебек, йөрәк тә кешене шулай чагылдырып күрсәтә.

²⁰Үлем йорты һәм һәлакәт мәйданы һич туймас; кешенең күзе дә шулай күреп туймас.

²¹Көмеш эретү өчен — кызу мич, алтын эретү өчен утлы учак кирәк, ә кешенең абруе мактау белән сыналыр.

²²Ахмакны ашлыгы белән бергә килегә салып төйсәң дә, аны ахмаклыгыннан аерып алып булмый.

²³Мал-туарыңны яхшылап кара, көтүең иминлеген кайгырт.

²⁴Чөнки байлык мәңгелек түгел; хакимият тә гел нәселдән-нәселгә күчеп йөрми.

²⁵Үлән шиңәр, аның урынына яңалары чыгар, тауларда яшеллекләр җыеп алыныр.

²⁶Сарыклар сине кием-салым белән тәэмин итәр, кәҗәләрең җир сатып алырга тотылыр.

²⁷Кәҗәләрең синең үзеңә, гаиләңә һәм асрауларыңа җитәрлек сөт ризыгы бирер.