Read Изге Язма, 2015 Гыйбрәтле сүзләр 29 Bible Online

Гыйбрәтле сүзләр 29 - Изге Язма, 2015 bible

Гыйбрәтле сүзләр 29

¹Күп мәртәбә шелтәләнеп тә, һаман үз киресен дәвам иткән кеше беркөн кинәт сынып төшәр, һәм котылуга аның һичбер юлы калмас.

²Тәкъвалар идарәлегендә халык бәйрәм итәр, ә яманнар хакимлек иткәндә, халык ыңгырашып елар.

³Зирәклек иясе үзенең атасын шатландырыр, ә азгын хатыннар белән чуалучы исә мал-мөлкәтен туздырыр.

⁴Патша мәмләкәтне гаделлек белән ныгытыр, ә бүләк яратучы аны бөлгенлеккә төшерер.

⁵Дустына ялагайланучы кеше үзенең аягына ятьмә сала.

⁶Яман кешенең гөнаһында үзенә дигән тозак бар, ә тәкъва кеше куанып һәм җырлап яшәр.

⁷Тәкъва кеше фәкыйрьнең дәгъвасын җентекләп тикшерер, ә яман кеше аңа игътибар да итмәс.

⁸Мәсхәрәләүчеләр шәһәрне фетнәгә салыр, зирәкләр исә шәһәрдә тынычлык урнаштырыр.

⁹Зирәк кеше белән хөкем дәгъвасында ахмак кеше ачуланыр, мәсхәрәләп көләр, әмма аңа карап тынычлык урнашмас.

¹⁰Канга сусаучылар гаепсез кешене дошман күрер, ә гадел кеше гаепсезнең тормышы турында кайгыртып яшәр.

¹¹Эчендәге ачуын ахмак кеше капылт тышка чыгарыр, ә зирәк кеше ачуын тыеп торыр.

¹²Әгәр хөкемдар ялган сүзгә колак сала икән, димәк, аның барлык киңәшчеләре дә намуссыз дигән сүз.

¹³Ярлы белән залимнең охшашлыгы шундадыр: аларның икесенең дә күзләренә яктылыкны Раббы бирә.

¹⁴Әгәр патша ярлыны гадел хөкем итә икән, димәк, аның тәхете дә гомерлек.

¹⁵Чыбык белән шелтә сүзе зирәклек бирер, әмма игътибарсыз калдырылган бала үз анасын хурлыкка төшерер.

¹⁶Яманнар арту белән явызлык та артыр, әмма тәкъвалар яманнарның һәлакәтен үз күзләре белән күрерләр.

¹⁷Углыңа җәзаны кызганма — күңелең шат, җаның тыныч булыр.

¹⁸Вәхиләр иңмәгән халык — йөгәнсез халык; Канунга тугры кеше бәхетле булыр.

¹⁹Кол кеше сүз белән генә тәрбия ителмәс, чөнки ул, сүзләрне аңласа да, аларга колак салмас.

²⁰Ашыгып сөйләүче кешене күргәнең бармы? Андый кешегә караганда ахмакта өмет күбрәк.

²¹Колны бала чагыннан ук назлап тәрбияләсәң, соңрак ул синең мирасчың булырга да теләр.

²²Ачулы кеше ызгыш-талаш чыгарыр; дуамал кеше күп гөнаһлар эшләр.

²³Тәкәбберлек кешене түбәнәйтә; тыйнак рухлы кеше хөрмәт казаныр.

²⁴Угры белән табыш бүлешүче кеше — үзенең җанына дошман; Аллаһыдан үз өстенә ләгънәт-җәза төшәсен белсә дә, ул хак сүз сөйләмәс.

²⁵Кешедән курку — корылган тозак, ә Раббыга таянучы хәвефсез булыр.

²⁶Күпләр хөкемдардан мәрхәмәт эстәр; әмма гаделлекне кеше фәкать Раббыдан таба.

²⁷Тәкъвалар — гаделсезләргә, ә яманнар туры юлдан йөрүчеләргә җирәнеп карар.