Read Изге Язма, 2015 Гыйбрәтле сүзләр 3 Bible Online

Гыйбрәтле сүзләр 3 - Изге Язма, 2015 bible

Гыйбрәтле сүзләр 3

¹Углым! Минем нәсыйхәтләремне онытма һәм боерыкларымны йөрәгеңдә сакла;

²шулай эшләсәң, алар синең гомереңне озайтыр, имин яшәү елларыңны арттырыр.

³Мәрхәмәт һәм тугрылык сине ташламасын; аларны муенса итеп муеныңа багла, йөрәгеңнең түренә язып куй.

⁴Шул чакны син үзең дә Аллаһы каршында, кешеләр алдында мәрхәмәт һәм илтифат казанырсың.

⁵Бөтен йөрәгең белән Раббыга сыен, үз белдегеңә таянма.

⁶Йөрер юлларыңда һәрвакыт Аллаһыны юлдаш ит, Ул синең адымнарыңны туры якка юнәлдерер.

⁷Үзеңне акыл иясе дип санама; Раббыдан курык, Аны хөрмәт ит һәм явыз гамәлләрдән ерак тор.

⁸Менә шулар синең тәнең өчен — шифа, сөякләрең өчен азык булыр.

⁹Раббыны малыңнан өлеш чыгарып һәм беренче уңышың белән хөрмәтлә.

¹⁰Шулай итсәң, амбарларыңда түбәләмә муллык булыр, кисмәкләреңдә яңа шәраб чишмәләре ташып торыр.

¹¹Углым! Раббының сабагын кире какма, Аның шелтәсенә рәнҗемә;

¹²ата кеше үзенең сөйгән углын ничек шелтәләсә, Раббы да Үзенең яраткан бәндәсен шулай шелтәли.

¹³Акыл җыеп, зирәклеккә ирешкән адәм — менә кем ул бәхетле кеше!

¹⁴Зирәк акыл иясе көмеш тапкан кешедән баерак, һәм моңардан килгән табыш та алтын-көмештән килгән табышка караганда күпкә мулрак.

¹⁵Зирәк акыл асылташлардан күп мәртәбә кыйммәтрәк, син теләгән бер нәрсә дә аның белән тиңләшә алмый.

¹⁶Зирәк акыл иясенең уң кулында — гомер озынлыгы, сул кулында — байлык һәм хөрмәт.

¹⁷Аның йөрер юллары — хозур-күркәм, атлаган сукмаклары тыныч-имин булыр.

¹⁸Зирәк акыл — аны казанучылар өчен тереклек агачы ул, аны саклап тотучылар өчен — бәхет.

¹⁹Зирәк акылы белән Раббы җирне бар итте, күкләрне яратты.

²⁰Аның зирәк акылы белән упкыннар ачылды, болытлар яңгыр яудырды.

²¹Углым! Син моны күз уңыңнан төшермә; сәламәт акылыңны һәм уйлап эш итүеңне сакла,

²²шулай эшләсәң, алар синең җаның өчен яшәү һәм муеның өчен бизәк булырлар.

²³Шулчак син үз юлыңнан хәвефсез һәм абынмыйча йөрерсең.

²⁴Йокларга яткач курыкмассың, йокың исә тыныч-тәмле булыр.

²⁵Көтелмәгән афәт килгәндә, яман бәндәләр сиңа һәлакәт белән янаганда — куркып калмассың;

²⁶чөнки Раббы синең таянычың булыр, Ул синең аягыңны тозакка эләгүдән саклап торыр.

²⁷Хәлеңнән килгәндә, мохтаҗларга игелек күрсәтүдән баш тартма.

²⁸Яныңда әйберең була торып, күршеңә: «Бар, чык, иртәгә керерсең, шунда бирермен», — димә.

²⁹Синең янда шик-шөбһәсез яшәүче якыныңа мәкер тотма.

³⁰Сиңа явызлык эшләмәгән кеше белән сәбәпсез ачуланышма.

³¹Көченә таянып, бүтәннәргә җәбер кылучы кеше белән ярышма, аның бер генә әмәлен дә үзеңә үрнәк итмә;

³²чөнки яманлык кылу — Раббы алдында зур кабахәтлек. Ә Раббы фәкать гадел гамәлле бәндәләре белән генә аралаша.

³³Раббы Үзенең ләгънәтен яманнар өстенә яудыра, ә тәкъва бәндәләренең өйләренә фатихасын күндерә.

³⁴Мактанчык тәкәбберләрдән Ул көлә, тыйнак-күндәм бәндәләренә исә мәрхәмәтен күрсәтә.

³⁵Зирәк акыл шөһрәт казаныр, ә ахмаклардан мираска бары хурлык калыр.