Read Изге Язма, 2015 Гыйбрәтле сүзләр 30 Bible Online

Гыйбрәтле сүзләр 30 - Изге Язма, 2015 bible

Гыйбрәтле сүзләр 30

¹Мәссә кавеменнән Якый углы Агурның сүзләре. Бу кеше болай дигән: — Мин бик арыдым. Раббым, мин бик арыдым, йончып-йөдәп беттем.

²Чыннан да, мин башка кешеләр белән чагыштырганда томана икәнмен, миндә акыл дигән нәрсәнең әсәре дә юк икән.

³Зирәклеккә дә өйрәнмәгәнмен, изге Затны белмәгәнмен.

⁴— Кем күккә ашты да, кем күктән иңде?! Кем җилне үзенең учына җыйды?! Кем суларны киемгә урап бәйләде?! Җирнең чикләрен кем билгеләде?! Аның исеме ничек? Углының исеме ничек? Беләсеңме шуны?

⁵Аллаһының һәр сүзе саф-пакьтер; Ул — Үзенә сыенучылар өчен калкан.

⁶Аллаһының сүзләренә өстәмәләр кертмә, югыйсә Ул сиңа шелтәсен белдерер, һәм син ялганчы булып чыгарсың.

⁷И Раббым, Синнән шушы ике нәрсәне сорыйм, мин исән чакта гозеремне кире какма:

⁸алдашуны һәм ялган сүзне миннән читләштер, миңа фәкыйрьлек тә, байлык та бирмә, мине көндәлек икмәгем белән туендыр.

⁹Чөнки, ризыгым күп булса, «Кем ул — Раббы?» дип әйтүем һәм Сине инкяр итүем яки фәкыйрьләнеп урлаша башлавым һәм Синең исемеңә тап төшерүем бар.

¹⁰Хезмәтчене аның хуҗасына яманлап сөйләмә, югыйсә ул сиңа ләгънәт укыр да, син үзең гаепле булып калырсың.

¹¹Үз атасына ләгънәт укучы һәм үз анасын хәер-догадан мәхрүм итүче ыруг бар.

¹²Үзенең пычрагына кереп баткан булса да, үзен пакь дип санаучы ыруг бар.

¹³Аһ, тагын шундый ыруг бар: анысы күз керфекләрен калкытып, тәкәббер күз карашын төбәп торыр.

¹⁴Җир йөзендәге барлык фәкыйрь һәм хәерчеләрне йотарга әзер торган кылыч тешле, пычактай теш казналы ыруг та бар.

¹⁵Сөлекнең ике кыз баласы бар, икесенең дә исеме «Бир-бир». Һичкайчан тамагы туймас өч нәрсә бар, «җитәр!» дигәнне белмәгән хәтта дүрт нәрсә бар:

¹⁶үлеләр аймагы, кысыр карын, суга туймас туфрак һәм «җитәр!» дигәнне белмәс ут.

¹⁷Атасын мәсхәрәләп көлүче һәм анасына итагатьне үзенә хурлык дип санаучының күзен үзән козгыннары чукып чыгарыр һәм ерткыч кошлар ашар.

¹⁸Минем өчен ирешә алмаслык өч, юк, дүрт нәрсә бар:

¹⁹күктәге бөркет юлы, кыя өстендәге елан юлы, диңгез уртасындагы кораб юлы һәм ир кешенең кыз кешегә гашыйклык юлы.

²⁰Зиначы хатынның да юлы шундый; уйнаш итәр өчен ашар-эчәр дә, авызын сөртеп: «Мин бернинди начарлык эшләмәдем», — дияр.

²¹Өч нәрсәне, юк, дүрт нәрсәне җир чыдата алмас һәм тетрәр:

²²патша тәхетенә утырган колны, күбенгәнче икмәк ашаучы ахмакны,

²³хурлыкка төшкән хатынның кияүгә чыгуын, бикәсенең урынын алган кол хатынны.

²⁴Җир йөзендә кечкенә генә дүрт мәхлук бар, әмма алар зирәкләрдән зирәгрәк:

²⁵кырмыска кавеме көчле түгел, әмма алар җәен үзләренә ризык әзерләп куяр;

²⁶кушаяклар да көчле түгел, әмма алар кыяларда үзләренә өн ясар;

²⁷саранчаларның патшалары юк, әмма алар бердәм оешып хәрәкәт итәләр.

²⁸Үрмәкүч аягы белән диварга ябышып йөри, шулай булса да патша сараендагы бүлмәләргә үтеп керә.

²⁹Менә йөреш-хәрәкәте мәһабәт булган өч, юк, адымнары вәкарьле дүрт җан иясе:

³⁰җәнлекләр арасында иң көчле һәм һичкемгә баш бирмәс арыслан;

³¹тәкәббер әтәч, тәкә һәм үз халкы белән идарә итүче патша.

³²Әгәр син тәкәбберлегең аркасында берәр ахмаклык яки мәкер уйлаган булсаң, учың белән тизрәк авызыңны капла;

³³чөнки сөтне болгатудан — май, борынга сугудан кан чыккан кебек, ачуны кыздыру да ызгыш-талаш чыгара.