Read Изге Язма, 2015 Гыйбрәтле сүзләр 31 Bible Online

Гыйбрәтле сүзләр 31 - Изге Язма, 2015 bible

Гыйбрәтле сүзләр 31

¹Мәссә кавеменең патшасы Лемуилнең анасы аңа менә шушы үгет-нәсыйхәтләрен әйтеп калдырган:

²— И углым, сиңа ни әйтим? И карынымнан өзелеп төшкән углым, сиңа ни дим? И нәзерләремнең углы, сиңа нәрсә өйрәтим?

³Көчеңне дә, ирлек куәтеңне дә патшаларны һәлакәткә дучар итүче хатыннарга сарыф итмә.

⁴И Лемуил, шәраб эчү — патшалар шөгыле түгел, каты эчемлекләр эзләп йөрү — башлык-түрәләр эше түгел.

⁵Чөнки алар эчеп-исереп йөрсә, кануннар онытылачак, җәбер-золымга дучар ителгәннәрнең хаклары якланмаячак.

⁶Каты эчемлекне — һәлакәт юлына басучыларга, шәрабны җан газабы кичерүчеләргә калдырыгыз.

⁷Эчсеннәр һәм үзләренең фәкыйрьлекләрен, үзләренең газапларын онытсыннар.

⁸Өнсезләр хакын, хокуксызлар дәгъвасын яклап, сүзеңне әйт.

⁹Гадел хөкем хакына, ярлылар һәм хәерчеләрне яклап, сүзеңне әйт.

¹⁰Игелекле хатынны кем таба алыр? Андый хатын асылташлардан да кадерлерәк.

¹¹Андый хатынга ире бөтен йөрәге белән ышаныр — аның белән ул беркайчан да мохтаҗлык күрмәс.

¹²Андый хатын иренә яманлык кылмас, гомере буе игелекле булыр.

¹³Йон һәм җитен җитештерер, кулларын һич эшсез тотмас.

¹⁴Андый хатын, сәүдә көймәләре кебек, икмәген ераклардан китерер.

¹⁵Ул, иртә таңнан торып, гаиләсен ашатыр, хезмәтче кызларга эш бүлеп бирер.

¹⁶Кыр-басулар турында кайгыртып, җирләр сатып алыр; үзе тапкан акчасына йөзем бакчалары булдырыр.

¹⁷Билен кысып бәйләп куеп, кулларының көч-куәтен арттырыр.

¹⁸Башкарган эшенең кыйммәтен белер, һәм төннәрен дә аның бүлмәсендә шәм яктысы сүнмәс.

¹⁹Ул, кулларын кабага таба сузып, зырылдата-зырылдата бармаклары белән орчык бөтерер.

²⁰Андый хатын фәкыйрьләргә игелек күрсәтер, мохтаҗларга ярдәм кулы сузар.

²¹Кар яуса да — курыкмас, чөнки аның бөтен гаиләсе ике кат җылы кием белән тәэмин ителгән булыр.

²²Ул үзенә келәмнәр сугар, аның киемнәре нәзек җитеннән һәм җете кызыл төстәге йон тукымадан булыр.

²³Аның ире, абруйлы кеше булып, илнең өлкәннәре белән бергә утырыр.

²⁴Андый хатын кием-салым тегеп сатар, сәүдәгәрләр өчен бил каешлары тегәр.

²⁵Ныклык һәм яхшы сыйфатлылык — аның өс киемедер; ул үзенең киләчәгенә өмет белән карар.

²⁶Аның авызы акыллы сүзләр белән ачылыр, телендә фәкать ягымлы-тыйнак үгет-нәсыйхәт сүзләре булыр.

²⁷Андый хатын үзенең хуҗалыгы һәм өе хакында кайгыртыр, бушка икмәк ашап ятмас.

²⁸Балалары аның: «Син бәхетле!» — диярләр; ире дә аны мактар:

²⁹«Игелекле хатыннар күп булгандыр, әмма син аларның һәммәсеннән өстен!» — дияр.

³⁰Ягымлылык ышанычсыз, гүзәллек тә — буш нәрсә; әмма Раббыдан куркучы һәм Аны хөрмәт итүче хатын мактауга лаек.

³¹Андый хатынның куллары җимешеннән аның үзенә дә өлеш чыгарыгыз һәм халык җыеннарында аның эшләренә дан җырлагыз!