Read Изге Язма, 2015 Гыйбрәтле сүзләр 6 Bible Online

Гыйбрәтле сүзләр 6 - Изге Язма, 2015 bible

Гыйбрәтле сүзләр 6

¹Углым! Әгәр син якыныңа ярдәм вәгъдә итеп тә, икенче берәү хакын яклап кулың сузгансың икән,

²син, димәк, телеңнән төшкән вәгъдәң тозагына каптың, авызыңнан чыккан сүзләр ятьмәсенә кереп буталдың.

³Углым, үзеңне коткару чарасына кереш: син — якыныңның ятьмәсендә; аның янына ашык, аягына егыл, коткаруын үтен.

⁴Йокыңны оныт, күз кабакларың йокымсырап йомылмасын.

⁵Аучы кулыннан — тау кәҗәсе кебек, кошчы авыннан — кош кебек, үзеңне коткар.

⁶И ялкау, барып, әнә кырмысканы күр: ул ничек тырыша, гыйбрәт ал.

⁷Аның өстеннән күзәтүче башлык та, идарәче дә, хөкемдар да юк.

⁸Әмма ул җәен, урак вакыты беткәнче, үзенә ризык әзерли.

⁹И ялкау, кайчанга кадәр син ял итәрсең икән? Йокыңнан кайчан уянырсың икән?

¹⁰«Бераз йоклап алыйм, бераз черем итеп алыйм, кулларыма ял биреп ятып торыйм»

¹¹дигән арада өеңә, карак кебек, ярлылык килеп керер, өстеңә, юлбасар кебек, мохтаҗлык ябырылыр.

¹²Яман кеше, хәйләкәр-алдакчы кеше үзенең авызыннан ялган сибеп йөрер;

¹³күзләрен челт-мелт йомгалар, аякларын әрле-бирле айкар, бармаклары белән ишарәләп сөйләр.

¹⁴Күңелендә мәкер булыр; һәрвакыт явызлык уйлап, гауга чыгарып йөрер.

¹⁵Шуңа күрә аның һәлакәте дә кисәктән булыр — аны көтмәгәндә бәреп егар, котылуга юл калдырмас.

¹⁶Раббыны нәфрәтләндерә торган алты нәрсә бар, хәтта җиде нәрсә Аңа җирәнгеч:

¹⁷тәкәббер күзләр, ялганчы тел, гаепсезгә кан коючы куллар,

¹⁸усал ният-мәкер тулы йөрәк, явызлык юлында җитез чабучы аяклар,

¹⁹ялган сөйләп шәһадәт бирүче шаһит [3] һәм кардәш-туганнар арасында җәнҗал-гауга тудыручы кеше.

²⁰Углым! Атаң нәсыйхәтен тыңла һәм анаң үгетен кире какма.

²¹Алар һәрвакыт синең күңелең түрендә булсын, аларны муеныңа урап куй.

²²Йөрер юлларыңда алар сиңа туры юнәлеш күрсәтерләр; йокларга яткач, сине саклап торырлар; уянгач, синең белән дустанә әңгәмә корырлар.

²³Чөнки нәсыйхәт ул — чыраг, үгет ул — яктылык, гыйбрәтле сүзләр — тормышка юлдыр.

²⁴Болар сиңа азгын хатын вәсвәсәсеннән, чит-ят хатынның юмакай теленнән саклану өчен кирәк.

²⁵Ул хатын үзенең гүзәллеге белән синең күңелеңне аздырмасын һәм керфек сирпүләре белән сине сокландыра алмасын.

²⁶Уйнашчы хатын сине бер телем икмәккә калдырыр; ә чит-ят хатын кадерле җаныңнан яздырыр.

²⁷Берәү, өстендәге киемен яндырмыйча, куенында ут йөртә алырмы?!

²⁸Яки берәү, аякларын пешермичә, утлы күмер өстендә йөри алырмы?!

²⁹Үз якынының хатыны янына кергән кеше белән дә шулай була; кем андый хатынга кагыла, ул җәзасыз калмый.

³⁰Ачыккан карак җанын саклау, тамагын туйдыру өчен урлашса, кешеләр аны артык хур күрмиләр;

³¹әмма урлаганда тотылса, ул зыян өчен җиде тапкыр артыграк итеп түли һәм өендә булган бөтен малын бирә.

³²Чит-ят хатын белән зина кылучының акылы зәгыйфь; моны эшләүче үзенең җанын харап итә.

³³Ул кыйналуга һәм мәсхәрә-хурлыкка дучар була, андый хурлык исә гомер буе онытылмый.

³⁴Чөнки көнчелек — ир кешедәге ярсыткыч бер хис ул, үч алганда, ул хис беркемне аямый,

³⁵аны бернинди йолым хакы, бернинди ришвәт белән дә ризалаштырып, каплап булмый.