Read Изге Язма, 2015 Гыйбрәтле сүзләр 7 Bible Online

Гыйбрәтле сүзләр 7 - Изге Язма, 2015 bible

Гыйбрәтле сүзләр 7

¹Мин әйткән сүзләрне, углым, онытма, үгет-нәсыйхәтләремне күңелең түрендә сакла.

²Нәсыйхәтләремә тугры булып яшә; минем өйрәтүемне күз алмасыдай кадерләп сакла.

³Аларны бармакларыңа урап бәйлә, йөрәгеңә язып куй.

⁴Зирәклеккә «кыз кардәшем» диген, ә акылга «туганым» дип эндәш.

⁵Шулчак син башка берәү хатынының да, юмакай телле чит-ят хатынның да вәсвәсәсенә бирелмәссең.

⁶Бервакыт мин, төнге караңгылык төшә башлаган кичке эңгер-меңгер вакытта, өем тәрәзәсеннән рәшәткә аша урамга карап тора идем.

⁷7-9 Шулчак күрдем: кичке эңгер төшеп, караңгылана башлагач, жилбәзәк бер егет тәҗрибәсез яшь кешеләр төркеменнән аерылды да мәйдан аша урамны кисеп чыкты һәм ирле хатын яши торган өйгә таба юнәлде.

¹⁰Ул арада өй ишегендә фахишәләрчә киенгән хәйләкәр хуҗа хатын күренде.

¹¹Аяклары өйдән чыгып китәргә җайланып торган, шау-шулы һәм тотнаксыз бер хатын иде ул.

¹²Урамдамы, мәйданнардамы — һәркайда, һәр почмакта ул мәкерле эшләр корып йөри иде.

¹³Менә ул, егетне каршылап, аны кочаклап үпте һәм оятсыз кыяфәт белән аңа болай диде:

¹⁴— Татулык корбаны китереп, бүген менә үземнең нәзеремне үтәдем.

¹⁵Шуның өчен, сине күрим дип, каршыларга чыктым һәм теләгәнемне таптым.

¹⁶Ятагыма асыл келәмнәр, Мисыр парчалары җәйдем.

¹⁷Ятагыма мирра, сабур [4], дарчин хушбуйлары сиптем.

¹⁸Әйдә, кер, иртәнгә кадәр күңел ачарбыз, сөешеп ләззәтләнербез.

¹⁹Чөнки ирем өйдә юк — ул ерак сәфәргә китте.

²⁰Үзе белән бер янчык көмеш алды; ай тулганда гына кайтачак.

²¹Хатын, үзенең шушы ягымлы, җылы-йомшак сүзләре белән мавыктырып, егетне тәмам үзенә җәлеп итте.

²²Һәм егет, сугым үгезе кебек, ук каршына атылып чыккан болан кебек,

²³аучы тозагына очып кергән кош кебек, һәлак буласын абайламыйча хатын артыннан иярде.

²⁴Шуңа күрә, и угылларым, мине тыңлагыз, сүзләремә дикъкать итегез.

²⁵Күңелең чит-ят хатын мәкеренә алданмасын, аның бозык сукмакларында адашып йөрмәсен.

²⁶Чөнки андый хатын күпләрне бәлагә төшерде, күп могтәбәрләрнең үлеменә сәбәпче булды.

²⁷Чит-ят хатынның өе — кешене үлем йортына, һәлакәткә илтә торган юл башыдыр.