Read Изге Язма, 2015 Гыйбрәтле сүзләр 8 Bible Online

Гыйбрәтле сүзләр 8 - Изге Язма, 2015 bible

Гыйбрәтле сүзләр 8

¹Зирәк акыл, хикмәтле акыл үз авазын сезгә ишеттермиме?!

²Ул юл буйларындагы калкулыкларда, юл чатларында өндәп тора;

³шәһәр капкалары алдында, йорт ишекләре төбендә өндәп-чакырып тора:

⁴— И кешеләр, мин сезгә мөрәҗәгать итәм, минем өндәү авазым адәм балаларына юнәлтелгән!

⁵И аңсызлар, акыл белән эш итәргә өйрәнегез; и ахмаклар, акылга утырыгыз.

⁶Тыңлагыз, чөнки мин бик мөһим нәрсәләр турында сөйлим, минем гыйбрәтле сүзләрем — чын хакыйкать.

⁷Чөнки минем телем бары хак сүз сөйли, алдау минем телем өчен ят һәм җирәнгеч.

⁸Минем авыздан чыккан сүзләр барысы да гадел; аларда мәкер дә, хәйлә дә юк.

⁹Акылы булган кешегә — аңлаешлы, гыйлем ияләре өчен тугры һәм хак алар.

¹⁰Минем тәгълимат көмештән дә, хәтта саф алтыннан да кадерлерәк, шуңа күрә мин өйрәткәнне кабул итегез.

¹¹Зирәк акыл якутлардан яхшырак, күңел теләгән һәр нәрсәдән кадерлерәк.

¹²Мин, зирәк акыл, хикмәтле фикер белән дуслыкта яшим, төпле гыйлем эзлим.

¹³Раббыдан курку һәм Аны хөрмәт итү — явызлыкны дошман күрү дигән сүз; мин тәкәбберлекне, мин-минлекне өнәмим, золым юлына һәм мәкерле телләргә нәфрәт белән карыйм.

¹⁴Миндә — үгет һәм аек акыл; мин — гакылның үзедер, һәм кодрәт тә миндәдер.

¹⁵Минем кодрәтем белән патшалар патшалык итә, хөкемдарлар гаделлек урнаштыра.

¹⁶Минем кодрәтем белән түрә һәм башлыклар, җир йөзенең барлык хакимнәре гадел идарә итәләр.

¹⁷Мине яратучыларны мин яратам, һәм мине эзләүчеләр мине табарлар.

¹⁸Байлык һәм кадер дә, җуелмас хәзинә һәм бәрәкәт тә — минем ихтыярда.

¹⁹Минем җимешләрем алтыннан — иң саф алтыннан да гүзәлрәк, мин китергән файда саф көмешкә караганда күп югары.

²⁰Мин тәкъвалык юлыннан, гаделлек сукмагыннан йөрим

²¹һәм үземне яратучыларга байлык китерәм, аларның хәзинәләрен арттырам.

²²Раббы Үз юлының башында ук, борын-борыннан, Үзенең илаһи гамәлләрен башкарырга керешкәнче үк, мине булдырды.

²³Җир-дөнья башлануга кадәр үк, әүвәлдән үк барлыкка килдем мин.

²⁴Диңгез чоңгыллары әле булмаган вакытта ук, мул сулы чишмәләр-елгалар әле юк чакта ук тудым.

²⁵25-26 Аллаһы әле җирне дә, кырларын да, дөньяның башлангыч туфрагын да барлыкка китермәгән вакытта, таулар әле үз урыннарына урнаштырылудан элек, калкулыклардан элек тудым мин.

²⁷Аллаһы күкләрне яратканда, мин анда идем. Аллаһы диңгез упкыны өстеннән офык сызыгын сызган чакта,

²⁸күк йөзенә болытлар урнаштырган, упкыннардан чишмә юлларын ныгыткан чакта,

²⁹сулар үз чикләреннән ташып чыкмасын дип, диңгезгә ярлар ихтыяр иткән, җиргә нигез терәкләр куйган чакта,

³⁰мин һөнәрче сыйфатында Аллаһы янында булдым, һәр заман, һәр көн Аның сөенече, һәрвакыт Аның янында куанучы булдым.

³¹Аллаһы бар иткән дөньяны һәм адәм балаларын күреп сөендем.

³²Менә шулай, угылларым, мине тыңлагыз, бары миңа иярүчеләр бәхет табарлар!

³³Нәсыйхәтләремне тыңлагыз һәм акыл җыегыз; зирәк акылны кире какмагыз.

³⁴Минем капкам янында, өем ишеге төбендә һәр көн, мине көтеп, уяу сакта торган кеше бәхеткә ирешер!

³⁵Мине тапкан кеше тормыш юлын да табар һәм Раббысының илтифатын да казаныр.

³⁶Ә инде миңа каршы гөнаһ кылучы бөлгенлеккә төшәр; мине дошман күрүчеләр һәммәсе үлемне яр итәрләр.