Read Изге Язма, 2015 Гыйбрәтле сүзләр 9 Bible Online

Гыйбрәтле сүзләр 9 - Изге Язма, 2015 bible

Гыйбрәтле сүзләр 9

¹Зирәклек, җиде багана күтәреп, үзенә йорт салды,

²хайван чалды, тәмләткечләр кушып, шәраб куйды, аш табыны әзерләде.

³Аннан, асрауларын җибәреп, шәһәрнең калку урыннары өстеннән игълан әйттерде:

⁴— Кемгә акыл кирәк, монда килегез! Акылы сай булганнарны да чакырды:

⁵— Килегез, минем ашны ашагыз, мин хәзерләгән шәрабтан авыз итегез;

⁶акылсыз эшләрегезне ташласагыз, имин яшәрсез; акыллы юлда йөрегез, — диде.

⁷Мәсхәрәләп көлүченең сүзен дөресләсәң — мыскыл алырсың, яманны шелтәләсәң — хурлыкка калырсың.

⁸Мәсхәрәләп көлүчене шелтәләмә, юкса сине күрәлмас булыр; зирәкне шелтәлә — ул сине яратыр.

⁹Нәсыйхәтне зирәк кешегә җиткерсәң, ул тагы да зирәгрәк булыр; гадел кешене өйрәтсәң, ул белемен арттырыр.

¹⁰Зирәклекнең башы — Раббыдан курку һәм Аны хөрмәт итү; Раббының мөкатдәслегенә төшенү — акыллылык.

¹¹Чөнки зирәк акыл синең гомер көннәреңне арттырыр һәм гомер елларыңны озайтыр.

¹²Зирәк икәнсең, бу сиңа үзең өчен кирәк; мәсхәрәле көлүче икәнсең, михнәте дә үз өстеңә төшәр.

¹³Аңгыралык — берни белмәс гаугалы-аңсыз хатын —

¹⁴14-15 үз эшләре белән урамда үтеп-сүтеп йөрүче ирләрне җәлеп итәр өчен, өенең ишеге төбенә чыгып яки шәһәрнең берәр калкурак җиренә менеп, урындыкка утырыр да:

¹⁶— Кемгә акыл кирәк, монда килегез! — дип чакырыр; акылы сай булганнарга: —

¹⁷Урлап эчкән су татлы, урлап ашаган икмәк тәмле, — дип вәсвәсә салыр.

¹⁸Егет белми ки, анда кергәннәр инде мәет, үлем ияләредер.