Read Изге Язма, 2015 Вәгазьче 10 Bible Online

Вәгазьче 10 - Изге Язма, 2015 bible

Вәгазьче 10

¹Үле чебен хушбуйны бозган һәм сасыткан кебек, аз гына ахмаклык та зирәклекне һәм абруйны бозып куярга мөмкин.

²Зирәк кешенең йөрәге — уң тарафка, ә ахмакның йөрәге сул тарафка эшли.

³Ахмак кеше нинди генә юлдан китсә дә, аның эш-хәрәкәтенә акыл җитми: ул үзенең ахмаклыгын һәр очраган кешегә фаш итә.

⁴Түрәнең сиңа ачуы кабарса, хезмәт урыныңны ташлап китәргә ашыкма; мәгәр күндәмлек зуррак гаепләрне дә каплап калдыра.

⁵Мин кояш астында хөкемдар тарафыннан эшләнгән ялгышлыкка охшаш тагын бер гаделсезлек күрдем:

⁶ул — ахмак кешеләрнең югарыда, ә бай кешеләрнең түбәндә утыруы.

⁷Мин атка атланган колларны да, коллар сыман җәяү йөрүче түрәләрне дә күрдем.

⁸Чокыр казыган кеше үзе үк шул чокырга егылып төшәргә мөмкин; койма җимереп тишек уючыны елан чагарга мөмкин.

⁹Таш белән эш итүче үзе шул таштан имгәнергә мөмкин; утын яручы үз-үзен куркыныч астына куярга мөмкин.

¹⁰Балта үтмәсләнеп, йөзе кайралмаса, эшкә күп көч сарыф ителер; эш башкарганда, зирәклек файдалыдыр.

¹¹Еланны тылсымлаганчы ук, ул чага икән, аны тылсымлап торуның инде хаҗәте юк.

¹²Зирәк кешенең авызыннан чыккан сүз — игелекле, ә ахмакның теле аның үзен харап итә.

¹³Ахмакның сүз башлавы ук акылсыздыр, ә сүзенең ахыры — бөтенләй тилелек.

¹⁴Ахмак кеше күп лыгырдар. Алда ни буласын беркем белми; үзеннән соң нәрсә буласын ахмакка кем әйтсен?!

¹⁵Ахмак үз эшеннән тиз ялыгыр — ул хәтта шәһәргә бару юлын да белми.

¹⁶Әй ил халкы, патшаң яшүсмер булып, түрәләрең таң иртәдән мәҗлес ясый торган булса, кайгы-мәшәкатьтән башың чыкмас.

¹⁷Әй ил халкы, патшаң затлы нәселдән булып, түрәләрең азыкны кәеф-сафа кору өчен түгел, ә хәл алу өчен һәм үз вакытында ашый торган булса, син бәхетле.

¹⁸Ялкаулыктан өй түшәмең ишелеп төшәр; кулларың эшсезлегеннән өең эченә түбәңнән яңгыр тамчылап торыр.

¹⁹Мәҗлес күңел ачу өчен ясалыр; шәраб тормышны күңелле итәр өчен эчелер. Әмма боларның һәммәсе өчен көмеш кирәк.

²⁰Хәтта күңелеңнән генә булса да патшага каршы яман телләнмә; йокы бүлмәңдә байга каршы яман телләнеп сукранма: юкса күк кошының синең сүзләреңне эләктереп алып китүе һәм, канатландырып, аларны сибеп йөрүе мөмкин.