Read Изге Язма, 2015 Вәгазьче 6 Bible Online

Вәгазьче 6 - Изге Язма, 2015 bible

Вәгазьче 6

¹Кояш астында мин күргән чирләрдән адәм балалары өчен икенче бер яман чир дә бар.

²Аллаһы кемгәдер байлык-мөлкәт вә кадер-хөрмәт бирә, һәм андый кеше үзе теләгән бар нәрсәгә ия була ала, әмма Аллаһы аңа шулардан файдаланырга ирек бирми — аның булган бар байлыгы чит кешегә кала. Бу да — фани һәм авыр газап.

³Берәү, йөз баланың атасы булып, озын-озак гомер кичерергә мөмкин, ләкин ул күпме генә яшәсә һәм тормышның рәхәтен күрмәсә яки хөрмәт белән җирләнмәсә, үле туган баланың язмышы аныкыннан яхшырактыр.

⁴Чөнки үле туган баланың дөньяга килүе үк урынсыз иде: тууы белән үк ул кабат караңгылыкка китеп барды, исемен дә шул караңгылык йотты.

⁵Ул хәтта кояшны да күрмичә һәм һичнәрсә белмичә китте; аның ялы-рәхәте тегенекеннән күбрәк.

⁶Теге кеше ике мең ел яшәсә дә, малыннан игелек күрмәгәч, моннан аңа ни файда?! Ахыр чиктә, барыбыз да бер үк урынга китәбез түгелме соң?!

⁷Кешенең бөтен хезмәт җимеше — аның авызы өчен; аның җаны һичкайчан туймас.

⁸Зирәк кешенең — ахмактан, тереләр арасында йөри алган фәкыйрьнең бүтәннәрдән нинди өстенлеге бар?!

⁹Җанның, ашкынып, әрле-бирле сугылуына караганда күз белән күреп йөрүең хәерлерәк. Бу да — фани һәм бушка җил куу белән бердер.

¹⁰Булган бар нәрсә инде үз исемен алган; кешенең дә асылы мәгълүм — ул үзеннән көчлерәккә каршы тора алмый.

¹¹Дөньяда фани нәрсәләр бик күп; кешегә алардан ни файда?!

¹²Чөнки үзенең фани гомерен, ыгы-зыгылы аз көннәрен күләгәдәй яшәп уздырганда, нәрсәнең яхшы-яман икәнен ул каян белсен?! Үзеннән соң кояш астында тагын ниләр буласын аңа кем әйтсен?!