Read Изге Язма, 2015 Җырлар җыры 1 Bible Online

Җырлар җыры 1 - Изге Язма, 2015 bible

Җырлар җыры 1

¹Сөләйман турындагы җырлар җыры. [1] Иреннәре белән үпсен ул мине! Синең иркә-назың шәрабтан дә татлырак.

²[2] Тәннәреңнән хуш исләр аңкый, исемең дә хушбуй кебек синең; кызлар шуңа ярата сине.

³Күзең генә сирпе — без синең артыңнан чабарга әзер! Патша мине үзенең сараена алып керде. Син безнең өчен шатлык-сөенеч чыганагы, синең назларыңны шәрабтан дә югарырак күккә чөеп мактарбыз — яратуга лаек син!

⁴И Иерусалим кызлары! Кыдар чатырларыдай каратут йөзле булсам да, Сөләйманның чаршаулары сыман матур мин.

⁵Кара-тутлы булуыма исегез китмәсен — кояш шулай каралтты мине. Абыйларымның миңа ачулары килеп, йөзем бакчаларын сакларга кизү итеп куйдылар, ләкин үземнең баг-бостанымны саклап кала алмадым мин.

⁶Әйтче, сөеклем, кайда көтәсең син көтүеңне? Төшкелектә кайда ял итәсең? Нигә әле мин дусларыңның көтүләре янында, бөркәнчек бөркәнеп, каңгырып йөрергә тиеш ди?!

⁷И кызыкай, гүзәлләрнең дә гүзәле! Әгәр син моны белмисең икән, куй көтүләре артыннан ияреп бар да көтүче егетләр тирмәсе янында кәҗә бәтиләреңне утлатып йөр.

⁸Фиргавен арбасына җигелгән байталга охшаттым мин сине, мәгъшукам!

⁹Яңакларыңны асылма зиннәтләр бизәп тора, муеныңда муенсалар.

¹⁰Көмештәй җемелдәп торган алтын муенса эшләтербез сиңа, мәгъшукам!

¹¹Патша үз өстәле янында шулай утырганда, минем нард [3] хуш исләр таратып торды.

¹²Мәгъшукым минем — мирра бәйләме кебек, күкрәкләрем уртасында ята ул минем.

¹³Эн-Геди йөзем бакчаларындагы бәйләм-бәйләм кына чәчәкләре кебек минем сөйгән егетем!

¹⁴Аһ, нинди гүзәл кыз син, гүзәлкәем, нинди гүзәлсең! Күгәрченнекедәй синең күзләрең.

¹⁵Аһ, нинди гүзәл егет син, сөеклем, татлыдыр иркә-назларың! Ятагыбыз безнең — хәтфә чирәм үлән;

¹⁶өебезнең түшәм-түбәсе — эрбет ябалдашлары, диварлары — кипарислар.