Read Изге Язма, 2015 Җырлар җыры 2 Bible Online

Җырлар җыры 2 - Изге Язма, 2015 bible

Җырлар җыры 2

¹Мин — Шаронның нәркис гөле, үзәннәрнең лалә чәчәге!

²Чәнечкеле куаклар арасында лалә чәчәге ничек матур, кызлар арасында минем сөеклем дә шундый.

³Урман агачлары арасында алмагачлар ничек, егетләр арасында минем сөеклем дә шундый. Алмагачлар күләгәсендә утырып торырга яратам мин, аның җимешләре шундый татлы.

⁴Шәрабханәсенә алып керде ул мине, баш очымда җилфердәгән әләм — егетемнең мәхәббәте.

⁵Йөземле ризык белән, алма белән сыйлап, көч-дәрман өстәгез миңа — сөю утында янам мин.

⁶Мәгъшукымның сул беләге минем баш астында, ә уң кулы мине иркәли.

⁷И Иерусалим кызлары! Җәйраннар һәм кыр боланнары исеме белән ялынып-ялварып сорыйм сездән: үзе теләми торып хисләрен уятмагыз сөйгән кешенең, борчымагыз аның йокысын!

⁸Ишетелә мәгъшукымның аяк тавышы! Әнә, таулар буйлатып чаба, калкулыклар буйлап йөгерә ул миңа таба.

⁹Тау җәйранына һәм яшь боланга охшаган ул минем сөйгәнем. Әнә, безнең дивар артында басып тора ул, тәрәзәгә күз төшерә, рәшәткә аша күренеп-күренеп китә.

¹⁰Пышылдады миңа сөйгәнем: «Кузгал, сөеклем минем, гүзәлкәй генәм, каршыма чык!

¹¹Менә, кыш та үтеп китте инде, яңгырлары да үтте, туктады.

¹²Җирдә чәчәкләр күренде, кошлар сайрар чак җитте. Күк күгәрчен гөрли илебездә.

¹³Бөреләрен ачып, инҗир агачлары, йөзем куаклары чәчәк атты, хуш ис таратты. Кузгал, сөеклем минем, гүзәлкәй генәм, каршыма чык!

¹⁴Кыяташлар каплап алган тарлавыктагы күгәрченем минем! Йөзең ачып күрсәт миңа, тавышыңны ишеттер миңа, чөнки тавышың назлы синең һәм дә йөзең ягымлыдыр».

¹⁵Китерегез тотып йөзем бакчасын кимерүче төлкеләрне, төлке балаларын, чөнки шау чәчәктә безнең йөзем бакчалары.

¹⁶Минеке генә ул минем мәгъшукым, мин дә аныкы гына. Лалә чәчәкләре арасында көтү көтеп йөри ул.

¹⁷Сүрелгәнче көннең сулышы, күләгәләр эреп беткәнче әйләнеп кайт син, сөйгәнем минем, — текә тауларның җәйраны кебек, яшь боланы кебек җитез бул син!