Read Изге Язма, 2015 Җырлар җыры 4 Bible Online

Җырлар җыры 4 - Изге Язма, 2015 bible

Җырлар җыры 4

¹Аһ, нинди гүзәл кыз син, гүзәлкәем, нинди гүзәл! Челтәр аша төбәлгән күзләрең синең күгәрченнекедәй! Чәчкәйләрең синең Гилыгад тавыннан төшеп килүче кәҗә көтүен хәтерләтә;

²тешкәйләрең судан чыгып килүче, йоны кыркылган ап-ак куйлар көтүен хәтерләтә: һәрберсенә ияргәндер игезәк бәти, бәтисезләре юктыр куйларның.

³Ал тасмадай иреннәрең, уймактыр авызкаең. Бит очларың, урталай ярылган анар алмасыдай, челтәр аша алсуланып балкып торалар.

⁴Давытның калкан-сөңге элеп куя торган баганасы кеби синең муенкаең, мең калкан эленеп тора анда, гаярь яугирләр [5] калканы.

⁵Ике күкрәгең ике җәйран бәтие кебектер, кыргый лалә чәчәкләре арасында утлап йөргән игезәк болан бәтие кебек.

⁶Сүрелгәнче көннең сулышы, күләгәләр эреп беткәнче, күтәрелим хушбуй тауның түбәсенә һәм баш орыйм мирра калкулыкларына.

⁷Нинди гүзәлсең син, минем сөеклем, бернинди тап юктыр синдә.

⁸Ливаныңны калдыр син, и кәләшем! Ливаннан килеп җит син минем янга! Амана түбәсеннән, Сенир вә Хәрмун таулары түбәсеннән, арысланнар өне вә капланнар оясыннан бирегә ашык!

⁹Йөрәгемне яулап алдың син, сеңлем минем [6], кәләшем; бер күз сирпү белән яулап алдың йөрәгемне муеныңдагы бер муенса нуры белән.

¹⁰Аһ, нинди татлы синең иркәләвең, сеңлем минем, кәләшем минем. Аһ, шәрабтан дә татлы синең назың, тәнкәеңнең хуш исе барлык хушбуйлардан тәмлерәк.

¹¹Кәрәзле бал тама синең авызыңнан, кәләшем, бал вә сөт тәме телкәеңдә. Киемеңә сеңгән гөлләр исе — алар Ливанның хуш исләрен хәтерләтә.

¹²Сеңлем минем — йозактагы баг-бакча, минем кәләшем — капкачы ябык кое, томаланган чишмә.

¹³Синең баг-бостаныңда янып торган анарлар, татлы җиләк-җимешләр, кына гөлләр,

¹⁴нард һәм зәгъфраннар, хуш исле камышлар һәм дарчин куаклары, мирра һәм сабур тирә-якка тәмле исләр аңкытып утыра.

¹⁵Бакчаңны Ливанның саф-тере сулы кое һәм чишмәләре сугара.

¹⁶Күтәрел, и көньяк җиле! Син дә ис, и төньяк җиле! Исеп шулай, баг-бостанымны хуш исләргә төрендер! Килсен мәгъшукым үзенең бакчасына, үзе теләгән татлы җиләк-җимешләрдән авыз итсен.