Read Изге Язма, 2015 Җырлар җыры 5 Bible Online

Җырлар җыры 5 - Изге Язма, 2015 bible

Җырлар җыры 5

¹Килдем мин үз бакчама, сеңлем-кәләшем, мирра белән хуш исле үләннәр җыйдым, кәрәзле балдан авыз иттем, сөтемне дә, шәрабымны да эчтем. И дусларым, ашагыз! Эчегез, гашыйклар, туйганчы эчегез!

²Йоклыймын мин, әмма минем йөрәгем уяу. Әнә, мәгъшукымның ишек шакыган тавышын ишетәм: «Ач ишегеңне, сеңлем, сөеклем, күгәрченем минем, аппагым! Юкса, чәчләрем минем төнге чыкка чыланган, чигә бөдрәләрем дымланган».

³Мин бит инде чишенгән, киемнәремне хәзер ничекләр кире киим? Аякларымны юганмын, хәзер аны ничекләр тапландырыйм?

⁴Мәгъшукым миңа ишек ярыгыннан кулларын сузды — бөтен тәнемне тетрәнү алды.

⁵Сөйгәнемне каршыларга дип, мин торып чыктым: кулларымнан хуш исле мирра мае тамды, бармакларымнан сеңеп калды йозак тоткасына.

⁶Ишекне ачкан гына идем — сөеклем инде китеп барган! Минем җаным урыныннан чыгып китәрдәй булды. Мин аны эзләдем, ләкин таба алмадым; мин аңа эндәштем, ләкин ул җавап бирмәде.

⁷Төнге шәһәр сакчылары мине тотып алдылар да канга батырганчы кыйнап ташладылар, өстемнән бөркәнчегемне алып киттеләр дивар сакчылары.

⁸И Иерусалим кызлары! Мин ялынып-ялварып сорыйм сездән: әгәр сез минем сөеклемне очратсагыз әйтегез: «Сөю утында янам мин!»

⁹И гүзәлләрнең гүзәле! Нәрсәсе белән шулай матурлардан матуры соң ул синең сөйгәнең? Нәрсәсе белән башка гашыйклардан чибәррәк соң ул? Син нәрсә дип бездән шулкадәр ялынып-ялварып сорыйсың?

¹⁰Мәгъшукымның тәне ак-пакьтер, йөзкәйләре — алсудыр; ул — уннарча мең гашыйклар арасында бердәнбер.

¹¹Башкайлары — саф алтыннан коелган, дулкын-дулкын бөдрәләре козгынныкы кеби чем-кара;

¹²агымсуда йөзгән, сөттә гөр-гөр килеп коенган күгәрченнәрне хәтерләтә күзкәйләре.

¹³Яңаклары — хуш исле чәчәк түтәле, иреннәре — мирра исе аңкыткан лаләләр кеби.

¹⁴Кулкайларын, асылташлар тезеп, алтыннан ясаганнармыни; күкрәк-эчкәйләрен, зәңгәр якутлар тезеп, фил сөягеннән уйганнармыни;

¹⁵аяклары — алтын тәлинкәләргә бастырган мәрмәр баганалардай; буе-сыны Ливанның эрбет агачы кеби зифа-мәһабәт.

¹⁶Телләреннән аның бал тама, һәр нәрсәсе гүзәл, ягымлы. Менә кем ул минем мәгъшукым, менә нинди ул минем җан дустым, и Иерусалим кызлары!