Read Изге Язма, 2015 Җырлар җыры 7 Bible Online

Җырлар җыры 7 - Изге Язма, 2015 bible

Җырлар җыры 7

¹Борылып карачы, борылып кара, Шулам кызы, борылып карачы, борылып кара — күрикче бер, күрик үзеңне! Нигә әле сез Шулам кызына ике рәткә тезелгән биючеләр арасында [7] бөтерелгән кызга караган кебек карарга тиеш?!

²О, сандал кигән аякларың нинди төз һәм матур синең, шөһрәтле гүзәлкәй! Боткайларың синең осталардан да оста сынчы койгандай сылудыр.

³Кендегең — хуш исле шәраб һәрчак мөлдерәмә тулып торган касәдер, корсак-эчкәйләрең лаләләр белән бизәлгән бодай көлтәсе кебек матурдыр.

⁴Ике күкрәгең ике җәйран бәтие кебектер, игезәк болан бәтие кебек.

⁵Муенкаең — фил сөягеннән уеп ясалган манарадай зифадыр. Күзкәйләрең Бәйт-Раббим капкалары каршындагы Хишбун күлләре кебектер. Борынкаең Дәмәшкъкә каратып салынган Ливан манарасы кебектер.

⁶Башың синең Кәрмил тавы кебек мәгърурдыр, бөдрә чәчләрең, патшаны да әсир итәрдәй булып, кичке шәфәкъ нурларына коенадыр.

⁷Нинди ягымлы һәм мөлаем син, сөйкемле син, минем гүзәлкәем!

⁸Хөрмә агачы кебек зифа-төздер синең сының, күкрәкләрең хөрмә җимеше кебек тулышкандыр.

⁹Уйладым мин: «Менәрмен, — дидем, — хөрмә агачына, тотынырмын, — дидем, — җимеш тәлгәшенә; йөзем тәлгәшләре кебек тулышып торсын күкрәкләрең, алма исе килеп торсын сулышыңнан».

¹⁰Телләреңнән татлы шәраб тама синең. Ул шундый шәраб ки, иреннәремне һәм тешләремне дымландырып, сөйгәнемнең авызына талгын гына агып тора.

¹¹Барлык вөҗүдем [8] белән сөйгәнемнеке мин, аның да теләгәне мин генә.

¹²Кил дә, мәгъшукым, бергә сәхрәләргә чыгыйк, авыл-карьяләрдә төннәр куныйк.

¹³Иртәләрен йөзем бакчасында йөрербез: йөзем агачлары яфрак ярмадымы икән, бөреләре ачылмадымы икән, анарлар чәчәк атмадымы икән? Шунда мин сиңа иркә-назларымны бүләк итәрмен.

¹⁴Адәмут [9] инде хуш исләр таратты, ишек төбебез иске һәм яңа уңышның татлы җимешләре белән тулы; аларның барысын сиңа дип сакладым мин, мәгъшукым минем!