Read Изге Язма, 2015 Ишагыйя 18 Bible Online

Ишагыйя 18 - Изге Язма, 2015 bible

Ишагыйя 18

¹Хәбәшстан елгалары аръягына, канат шавы ишетелгән илгә — кайгы!

²Бу ил, камыш көймәләргә утыртып, су буйлап үзенең илчеләрен җибәрә. Әй җитез илчеләр! Җирләрен елгалар кискәләгән, озын буйлы, шома тәнле халык янына, бар тарафка дәһшәт сала, сәер телдә сөйләшә торган, көчле-җиңүчән кавем янына барыгыз!

³Әй әһле җиһан! Әй җир йөзендә яшәүчеләр! Тауларда байрак күтәрелгәч — күрерсез, быргы кычкырткач — ишетерсез!

⁴Чөнки Раббы миңа болай диде: «Эссе көндә һавада эленеп торган рәшә кебек, урак өсте челләсендә хәрәкәтсез торган чык болыты кебек, Мин дә Үз торагымнан тыныч кына күзәтеп торырмын».

⁵Йөзем куаклары инде чәчәк коеп, тәлгәшләре тула башлагач, уңыш өлгергәнне көтмичә, бакчачы пычагы белән Раббы үсентеләрне кисеп алачак, ботакларны өзеп ташлаячак.

⁶Аларны таулардагы ерткыч кошларга, кыргый җәнлекләргә калдырачак; җәен алар белән — кошлар, ә кышын кыргый җәнлекләр тукланачак.

⁷Җирләрен елгалар кискәләгән, озын буйлы, шома тәнле халык янына, бар тарафка дәһшәт сала, сәер телдә сөйләшә торган, көчле-җиңүчән кавем шул чакта Күкләр Хуҗасы Раббыга, Аның исемен йөрткән урынга — Сион тавына бүләкләр китерәчәк.