Read Изге Язма, 2015 Ишагыйя 19 Bible Online

Ишагыйя 19 - Изге Язма, 2015 bible

Ишагыйя 19

¹Мисыр турында әйтелгән пәйгамбәрлек сүзе. Менә, Раббы, җитез болытка утырып, Мисырга киләчәк. Аның каршында Мисыр потлары дер калтыраячак, мисырлыларның йөрәге куркудан туктап калачак.

²«Мисырлыларны Мин бер-берсенә каршы котыртам: шулчак туган — туганга, күрше — күршегә, кала — калага каршы чыгачак, һәм бер патшалык икенче патшалыкка каршы сугышачак.

³Мисырлылар төшенкелеккә биреләчәк; Мин аларның ниятләрен бозачакмын, алар потларга, үлгәннәрнең рухына, әрвахларны чакыручыларга, күрәзәчеләргә ярдәм эзләп барачак.

⁴Мисырлыларны Мин рәхимсез хөкемдар кулына тапшырачакмын — миһербансыз бер патша хакимлек итәчәк алар өстеннән», — ди Хаким, Күкләр Хуҗасы Раббы.

⁵Нил елгасының сулары кибеп, ул тәмам корыячак,

⁶аның ермаклары сасып бетәчәк; Мисырдагы агымсулар саегачак һәм кибәчәк, камышлары шиңеп төшәчәк.

⁷Елга тамагындагы үсемлекләр, елга буенда чәчелгән барча игеннәр, корып, җилгә очып юкка чыгачак.

⁸Балыкчылар кайгырачак, елгага кармак салган бар кеше үкереп елаячак, суга ятьмә салган кешеләр төшенкелеккә биреләчәк.

⁹Мисырның җитен талкучылары аптырашка калачак, тукучылары өметсезлеккә биреләчәк;

¹⁰җитен эрләүчеләр кайгыга батачак; барлык эшчеләр гамь чигәчәк.

¹¹Соган [31] түрәләре тәмам акылдан язды, фиргавеннең зирәк киңәшчеләре мәгънәсез киңәшләр бирә. Фиргавенгә: «Без — зирәкләр затыннан, борынгы патшалар нәселеннән», — дип әйтергә ничек телләре бара?!

¹²Кайда соң синең зирәк кешеләрең, фиргавен? Хәзер инде алар әйтсен сиңа, Күкләр Хуҗасы Раббының Мисырга нинди язмыш билгеләгәнен белдерсен.

¹³Соган түрәләре акылсыз, Мемфис [32] түрәләре үз-үзләрен алдый. Мисырның кабилә башлыклары Мисыр халкын юлдан яздырды.

¹⁴Раббы аларның зиһеннәрен чуалтты, һәм алар Мисырның йөргән юлларын саташтырдылар — Мисыр, сәрхуштәй чайкалып, үзенең косыгы өстендә йөри.

¹⁵Ни баш, ни койрык, ни хөрмә ботагы, ни камыш [33] — боларның берсе-бер инде Мисыр өчен һичнәрсә эшли алмаячак.

¹⁶Ул көнне мисырлылар куркак хатын-кызга охшап калачак: Күкләр Хуҗасы Раббы аларга Үзенең кулын күтәрүгә тетрәнеп китәчәк.

¹⁷Мисыр өчен Яһүдә коточкыч бер нәрсәгә әвереләчәк: Яһүдәне искә төшергән саен, алар Күкләр Хуҗасы Раббы билгеләгән язмыштан дер калтырап торачак.

¹⁸Ул көнне Мисыр җирендә кәнганиләр телендә [34] сөйләшкән һәм Күкләр Хуҗасы Раббыга тугрылык сакларга дип ант эчкән биш кала булачак; шуларның берсе Кояш каласы [35] дип аталачак.

¹⁹Ул көнне Мисыр уртасында — Раббыга багышланган мәзбәх, аның читендә Раббы хөрмәтенә куелган изге багана булачак.

²⁰Болар Мисыр җирендә Күкләр Хуҗасы Раббы барлыгын таныткан билге вә шаһитлык булачак; һәм Мисыр халкы, изүчеләрдән зарланып Раббыга ялваргач, Ул аларга коткаручы вә яклаучы җибәрәчәк.

²¹Раббы шулай Мисырга Үзен танытачак, һәм алар ул көнне Раббыны танып беләчәк, Аңа сәҗдә кылып, корбаннар вә бүләкләр китерәчәк, Аның алдында нәзерләр әйтеп, аларны үтәячәк.

²²Раббы Мисырны бик каты җәзалаячак, ә аннары дәвалап терелтәчәк. Алар Раббыга мөрәҗәгать иткәч, Ул, ялваруларын ишетеп, аларны терелтәчәк.

²³Ул көнне Мисырдан Ашшурга олы юл ачылачак, ашшурлылар — Мисырга, ә мисырлылар Ашшурга киләчәк; алар бергәләп Раббыга сәҗдә кылачак.

²⁴Ул көнне Исраил, шушы ике ил — Мисыр вә Ашшур белән бер дәрәҗәдә булып, бөтен дөнья уртасында хәер-фатиха ала торган җиргә әвереләчәк.

²⁵Күкләр Хуҗасы Раббы аларга фатиха биреп: «Әй халкым Мисыр, кулларым бар кылган Ашшур һәм биләмәм Исраил, мөбарәк фатихалы булыгыз!» — диячәк.