Read Изге Язма, 2015 Ишагыйя 2 Bible Online

Ишагыйя 2 - Изге Язма, 2015 bible

Ишагыйя 2

¹Амотс углы Ишагыйягә Яһүдә вә Иерусалим хакында ирешкән вәхи.

²Шундый көннәр килер, Раббы йорты урнашкан тау башка барлык таулардан биегрәк булыр, калкулыклар өстеннән күтәрелеп торыр, һәм бар халыклар шунда агылыр.

³Байтак халыклар, килеп: «Әйдәгез, Раббы тавына, Ягъкуб Алласы йортына меник, — дип әйтер. Ул безгә Үзенең юлларын өйрәтер, — һәм без шулардан йөрербез». Чөнки Канун — Сионнан, Раббы сүзе Иерусалимнән чыгачак.

⁴Кавемнәр арасында Ул хөкем оештырачак, күп халыкларның дәгъваларын хәл итәчәк; һәм алар кылычтан — сука төрәне, ә сөңгедән урак ясаячак; бер халык икенчесенә кылыч күтәрмәячәк, һәм сугыш һөнәренә алар бүтән өйрәнмәячәк.

⁵И Ягъкуб халкы! Әйдәгез, Раббы чәчкән яктылык нурында йөрик!

⁶Син Үзеңнең халкыңны — Ягъкуб нәселен ташладың, чөнки алар Шәрык халыкларының гореф-гадәтләренә ияреп киттеләр, пелештиләргә охшап сихерчелек кылырга өйрәнделәр, чит-ятлар белән аралаша башладылар.

⁷Аларның җире көмеш вә алтынга тулган, хәзинәләрендәге байлыкның исәбе-хисабы юк, илләрендәге атлар бихисап күп, сугыш арбалары санап бетергесез.

⁸Аларның җире потлар белән тулган, алар үз куллары белән эшләгән әйберләргә, бармаклары ясаган нәрсәләргә табыналар.

⁹Шулай, адәм баласы түбән тәгәрәде, һәрберсе хурлыкка калды, — кичермә Син аларны, Раббы!

¹⁰Раббының дәһшәтеннән, Аның шөһрәт вә мәһабәтлегеннән куркып, тау кыясы эченә кер, җир тузанына күмел!

¹¹Тәкәббер бәндәнең башы түбән иеләчәк, горурлыгы тыелачак; ул көнне бер Раббы гына югары күтәреләчәк.

¹²Чөнки һәр тәкәббер вә горур, югары күтәрелгән бәндәгә Күкләр Хуҗасы Раббының көне киләчәк, һәм шулчак алар түбәнсетеләчәк!

¹³Биек вә мәгърур Ливан эрбетләренә, Башан имәннәренә,

¹⁴барлык биек тауларга, текә калкулыкларга,

¹⁵һәр биек манарага, һәр ныгытылган диварга,

¹⁶Таршиш корабларына, барча матур көймәләргә дә киләчәк ул көн!

¹⁷Адәм баласының тәкәбберлеге юкка чыгачак, кешенең горурлыгы түбәнсетеләчәк, бары тик бер Раббы гына ул көнне югары күтәреләчәк,

¹⁸пот-сыннар бөтенләйгә гаип булачак [4].

¹⁹Ул көнне Раббы җирне дер селкетер өчен күтәреләчәк, һәм кешеләр Раббы дәһшәтеннән, Аның шөһрәт вә мәһабәтлегеннән куркып, кыядагы ярыкларга, җирдәге чокырларга кереп посачак.

²⁰ 20-21 Ул көнне Раббы җирне дер селкетер өчен күтәреләчәк, һәм кешеләр үзләре табынган көмеш вә алтын потларын сукыр тычканнарга вә ярканатларга ыргытачак; Раббы дәһшәтеннән, Аның шөһрәт вә мәһабәтлегеннән куркып, кыядагы ярыкларга вә тау-таш арасындагы тарлавыкларга кереп посачак.

²²Адәм баласына өмет баглаудан туктагыз: аның гомере, сулышы кебек үк, өзелергә генә тора; нәрсә эшли ала соң ул?!