Read Изге Язма, 2015 Ишагыйя 20 Bible Online

Ишагыйя 20 - Изге Язма, 2015 bible

Ишагыйя 20

¹Ашшур патшасы Саргон үзенең гаскәрбашын Ашдодка [36] җибәрде, һәм ул, Ашдодка һөҗүм итеп, аны басып алды.

²Аңарчы Амотс углы Ишагыйя аша Раббы болай дип әйткән иде: — Бар, билеңә ураган тупас тукымаларыңны, аягыңдагы сандалыңны салып ташла. Ишагыйя нәкъ шулай эшләде, шәрә килеш вә яланаяк йөри башлады.

³Шуннан Раббы болай дип әйтте: — Колым Ишагыйянең өч ел буе шәрә килеш вә яланаяк йөрүе — Мисыр вә Хәбәшстан турында алдан җибәрелгән кисәтүче билгедер:

⁴Ашшур патшасы Мисыр әсирләрен вә Хәбәшстан тоткыннарын — яшьләрне дә, картларны да — яп-ялангач вә яланаяк, хәтта оят җирләре дә капланмаган килеш куып алып китәр, һәм Мисыр мәсхәрә ителәчәк.

⁵Шул чагында Хәбәшстанга өмет баглаган, Мисыр белән горурланган кешеләрнең котлары алыначак, һәм алар хурлыкка калачак.

⁶Бу ярда яшәүчеләр [37] ул көнне: «Карагыз, Ашшур патшасыннан коткарыр дип, без өметләнеп торган, без ярдәм сорап барган кешеләргә нәрсә булган! Ничек котылырга инде хәзер безгә?!» — диячәкләр.