Read Изге Язма, 2015 Ишагыйя 25 Bible Online

Ишагыйя 25 - Изге Язма, 2015 bible

Ишагыйя 25

¹Әй Раббы, Син — минем Аллам! Сине зурлыйм, исемеңә рәхмәтләр юллыйм! Чөнки Син гаҗәеп эшләр башкардың, Үзеңнең күптәнге ниятеңне — дөрес вә ышанычлы ниятеңне тормышка ашырдың.

²Син шәһәрләрне таш өеменә әйләндердең, ныгытылган калаларны хәрабә иттең; чит-ят кешеләрнең ныгытмалары җимерелде, алар инде беркайчан да тергезелмәс.

³Шуңа күрә көчле халыклар Сине данлый, мәрхәмәтсез кавемнәрнең калалары Синнән өркеп тора.

⁴Юксыл-мескенгә, мохтаҗларга Син авыр вакытта сыеныр урын, давылда — ышыклык бирә торган, эссе көндә саклый торган күләгә булдың. Чөнки залимнәрнең сулышы — диварга каршы коеп яуган яңгыр,

⁵чүл-сахрадагы челлә кебектер. Син чит-ят халыкларның шау-шуын бастың; болыт күләгәсе кояшны каплаган кебек, залимнәрнең җырын томаладың.

⁶Күкләр Хуҗасы Раббы Сион тавында барлык халыклар өчен тәмле-тәмле ашамлыклардан, иң яхшы шәраблардан табын корачак; анда туклыклы ризыклар һәм иң яхшы, сөзелгән шәраблар булачак.

⁷Бу тауда Раббы барлык халыкларны каплап торган япманы, барлык кавемнәр өстенә ябылган пәрдәне алып ташлаячак,

⁸йотып җибәргәндәй үлемне мәңгегә юк итәчәк. Хуҗа-Раббы барлык кешеләрнең күз яшен сөртәчәк, бөтен җир буйлап Үз халкын хурлыктан коткарачак. Раббы, әнә шулай булачак, дип әйтте.

⁹Ул көнне болай дип әйтәчәкләр: «Менә бу — безнең Аллабыз! Без Аңа өметләнеп торган идек, һәм Ул безне коткарды. Ул — безнең Аллабыз! Өметебезне Аңа баглаган идек, инде безне коткарган өчен шатланыйк, куаныйк!

¹⁰Раббының кулы шушы тауны саклаячак». Ә Мәаб тирескә тапталган салам кебек булачак;

¹¹суга батучы кеше кебек кулларын болгатса да, ничек кенә тырышса да, Раббы аның тәкәбберлеген түбәнсетәчәк.

¹²Мәабның нык-биек диварларын Ул җимерәчәк, җиргә аударып көл-тузан итәчәк.