Read Изге Язма, 2015 Ишагыйя 31 Bible Online

Ишагыйя 31 - Изге Язма, 2015 bible

Ишагыйя 31

¹Мисырга ярдәм эзләп баручыларга — кайгы! Алар атларына ышаналар, күп санлы арбаларына өметләнәләр, җайдакларының көченә таяналар, ә Исраилнең изге Алласына карашларын төбәмиләр, Раббыдан киңәш сорамыйлар!

²Ә бит Ул зирәк — афәт җибәрер һәм Үз карарыннан кире кайтмас, явызлык кылучыга да, яман бәндәләргә ярдәм итүчегә дә каршы чыгар.

³Мисырлылар Аллаһы түгел, гади кешеләр; аларның атлары да рух түгел, җисем-тәннән гыйбарәт. Раббы Үзенең кулын җәйгәч, ярдәмгә килүче абыныр, ярдәм алучы егылыр — икесе бергә һәлак булыр.

⁴Раббы миңа шулай дип әйтте: «Үзенең табышы өстендә ырлап торган арыслан, яшь арыслан, әйләнәсенә күпме генә көтүче җыелса да, аларның кычкыруыннан өрекмәс, шау-шуыннан курыкмас. Шуның кебек, Күкләр Хуҗасы Раббы да Сион тавына, шушы калку урынга сугышырга төшәчәк.

⁵Үзенең балаларын кайгыртып, алар өстендә әйләнгән кош кебек, Күкләр Хуҗасы Раббы да Иерусалимне кайгыртачак — аны яклап йолып алачак, кызганып коткарып калачак».

⁶Әй Исраил балалары! Үҗәтләнеп Раббыгыздан йөз чөерсәгез дә, кире Аңа кайтыгыз!

⁷Шул көнне сезнең һәрберегез гөнаһлы куллары белән ясаган көмеш вә алтын потларны чыгарып ташлар.

⁸«Ашшур кылычтан һәлак булачак, ләкин кеше кулындагы кылычтан түгел; кылыч аны ашаячак, ләкин кеше кулындагы кылыч түгел. Ашшур кылычтан качачак; аның яшь егетләрен кол итеп эшкә җигәчәкләр.

⁹Ашшур патшасы куркып качачак [68], дошман байрагын күреп, түрәләренең коты алыначак». Уты — Сионда, учагы Иерусалимдә булган Раббы сүзе бу.