Read Изге Язма, 2015 Ишагыйя 32 Bible Online

Ишагыйя 32 - Изге Язма, 2015 bible

Ишагыйя 32

¹Шундый вакыт киләчәк: патша — дөреслек белән, түрәләр гаделлек белән хакимлек итәчәк.

²Аларның һәрберсе — җилдән саклана, давылдан ышыклана торган урын, чүл-далада — су ташкыны, корыган-кипкән җирдә биек кыя күләгәсе кебек булачак.

³Шул чагында инде күрүчеләрнең күзләре томаланмас, колагы ишеткәннәр колак салып тыңлар;

⁴уйлап эш итмәүчеләр фикер йөртә башлар, сакауларның телләре җиңел һәм ачык итеп сөйләр;

⁵ахмак кешене инде — намуслы, ә адәм актыгын мөхтәрәм дип атамаслар.

⁶Ахмак кеше бит акылсыз сүз сөйли, аның йөрәге явызлыкны үз итә; имансыз гамәлләр кыла ул, Раббы хакында ялган тарата, ач кешене — ризыксыз, сусаган кешене сусыз калдыра.

⁷Адәм актыгының кылган гамәлләре явыз: ярлы-мазлумның дәгъвасы дөрес булса да, аны ялган сүзләр белән һәлак итәр өчен, төрле хәйләләр кора ул.

⁸Ә намуслы кеше хак эш турында уйлый һәм хак нәрсәне яклап нык тора.

⁹Әй сез, ваемсыз хатыннар! Торыгыз, сүземә колак салыгыз! Гамьсез кызлар! Мин әйткәннәрне тыңлагыз!

¹⁰Бер елдан артык вакыт үтәр, һәм сезнең куркудан котыгыз алыныр, гамьсезләр! Чөнки йөзем җыюлар булмаячак, җиләк-җимеш өлгерми калачак.

¹¹Әй ваемсызлар! Куркудан котыгыз алынсын! Әй гамьсезләр! Дер калтырап торыгыз! Киемнәрегезне салып атып тупас тукымага төренегез!

¹² 12-13 Гүзәл басу-кырларны, мул уңышлы йөзем бакчаларын, халкымның җирен кызганып, күкрәгегезне төегез: ул җирдә күгән куагы һәм чәнечкеле билчән генә үсәчәк. Бәхетле йортлар, шатлык ташып торган кала турында елагыз!

¹⁴Чөнки зиннәтле сарай — кешесез, шау-шулы кала ташландык хәлдә калачак; калкулык вә күзәтү манарасы мәңгелек бушлыкка әвереләчәк, анда — кыргый ишәкләрнең яраткан урыны, терлек өчен көтүлек булачак.

¹⁵Югарыдан безгә Рух иңгәнче, болар һәммәсе шулай булыр. Аннары чүл — мул уңышлы бакчага, ә бакча булган җирләр урманга әйләнер,

¹⁶чүлдә гаделлек хөкем сөрер, бакчада хаклык-дөреслек урнашыр;

¹⁷хаклык-дөреслек шул чагында иминлек, мәңгелек тынычлык вә хәвефсезлек китерер.

¹⁸Ул вакытта минем халкым имин йортларда, хәвефсез урыннарда, тыныч торакларда яшәр.

¹⁹Бозлы яңгыр урманны аударып, нигезенә кадәр кала җимерелсә дә,

²⁰бәхет сезне ташламас: сез су булган җирләрдә иген чәчәрсез, үгез вә ишәкләрегезне утларга җибәрерсез.