Read Изге Язма, 2015 Ишагыйя 44 Bible Online

Ишагыйя 44 - Изге Язма, 2015 bible

Ишагыйя 44

¹Ә хәзер, колым Ягъкуб, тыңла! Мин сайлап алган Исраил, колак сал!

²Сине яраткан, ана карынында бар иткән ярдәмчең Раббы сиңа болай ди: „Курыкма, колым Ягъкуб — Үзем сайлап алган Ешурун [79],

³чөнки сусаган туфракка — су, корыган җиргә ташкыннар-елгалар агызам Мин, Үземнең Рухымны нәсел варисларыңа, фатихамны балаларыңа яудырам.

⁴Алар, су буендагы таллар кебек, үлән арасыннан шытып чыгачак.

⁵Берсе: ‘Мин — Раббыныкы’, — дияр, икенчесе үзен: ‘Ягъкуб’, — дип атар, өченчесе исә кулына ‘Раббыныкы’ дип язып куяр һәм Исраил исемен алыр“».

⁶Исраил Патшасы Раббы, аны йолып алучы Күкләр Хуҗасы Раббы болай ди: «Мин — беренче һәм соңгысымын, Миннән башка икенче бер алла юк!

⁷Кем Миңа тиңләшә ала?! Килсен дә шул турыда әйтеп бирсен! Борынгы халыкны Мин бар иткәннән бирле ниләр булганын бер-бер артлы сөйләп күрсәтсен, шулай ук киләчәктә ниләр буласын да хәбәр итсен!

⁸Курыкмагыз да, калтыранмагыз да: Мин боларны борынгы заманнарда ук сезгә игълан итмәдемме, алдан әйтеп куймадыммы әллә?! Сез — Минем шаһитларым. Миннән башка икенче бер алла бармы?! — Юк, бүтән кыя юк! Мин берсен дә белмим!»

⁹Потларны ясаучылар — барысы да яраксыз кешеләр, аларның яраткан потлары да бернинди файда китерми. Потлар, аларның шаһитлары, берни күрмиләр дә, аңламыйлар да, шуңа күрә ясаучылары хурлыкка төшәчәк.

¹⁰Бернинди файдасы булмаган илаһны кем ясый, сыннарны кем коя соң?

¹¹Сыннарга табынучылар һәммәсе рисвай булачак, һөнәрчеләр бары тик кеше генә бит! Һәммәсе бергә җыелып бассыннар — куркуга калып, һәммәсе хурлыкка төшәчәк!

¹²Тимерче, корал тотып, утлы күмер өстендә эшли, чүкечләр ярдәмендә сынны эшкәртә, үзенең көчле кулы белән аны ясый; эшли-эшли ул ачыга, хәлдән тая, су да эчми, тәмам көчен җуя.

¹³Балта остасы агачны бау белән үлчи, ясаласы сынның сурәтен очлы эш коралы белән сызып чыга, аны кискеч белән эшкәртә, җәзбә [80] ярдәмендә тикшерә. Аннары, изге урынга куяр өчен, кешегә охшатып матур сурәт ясый.

¹⁴Ул үзенә эрбет агачы кисеп ала; урмандагы бүтән агачлар арасыннан кипарис белән имәнне сайлап алып үсәргә калдыра. Шуннан нарат агачы утырта, ә яңгыр сулары аны үстерә.

¹⁵Агачлар кешегә ягар өчен утын була; аның бер өлеше ут тергезүгә, өй җылытуга, икмәк пешерүгә китә. Шул агачтан кеше үзенә илаһ та ясый, аңа табына, пот ясый һәм аның алдында сәҗдә кыла.

¹⁶Шулай агачның бер яртысын ул яга, аның өстендә ит кыздырып, туйганчы ашый. Җылынганнан соң, ул: «Аһ, мин җылындым, ут җылысын сизәм», — ди.

¹⁷Калган агачтан ул үзенә илаһ, сын ясый, аңа табынып сәҗдә кыла, «Коткар мине, син минем илаһым бит!» дип дога укый.

¹⁸Бу кешеләр белмиләр һәм төшенмиләр, аларның күзләре йомык — күрмиләр, аларның акыллары томаланган, фикер йөртә белмиләр.

¹⁹Араларында берсенең дә: «Мин агачның яртысын яндырдым, күмерендә икмәк пешердем, ит кыздырып ашадым. Калган яртысыннан, җирәнгеч сын ясап, шул агач кисәгенә сәҗдә кылыйммы инде?!» — дип уйларга акылы җитми.

²⁰Андый кеше тузан артыннан куа, чуалган акылы аны ялгыш юлга кертә, ул үзен коткара алмый яисә: «Уң кулымдагы әйбер ялган түгел микән?» — дип әйтә алмый.

²¹«Боларны исеңдә тот, әй Ягъкуб, исеңдә тот, Исраил, чөнки син — Минем колым! Сине Мин бар иттем, син — Минем колым, һәм Мин сине онытмаячакмын, Исраил!

²²Синең җинаятьләреңне — томан, гөнаһларыңны болыт кебек куып таратачакмын. Миңа кайт, чөнки Мин сине йолып алдым», — ди Раббы.

²³И күкләр, сөенегез-гөрләшегез, чөнки моны Раббы эшләде! Җир тирәнлекләре, шатлыктан кычкырыгыз! Куанышып җырлап җибәрегез, таулар, урман вә андагы барлык агачлар, чөнки Раббы Ягъкубны йолып алды, һәм Исраилдә Ул Үзенең дан-шөһрәтен күрсәтәчәк!

²⁴Сине йолып алучы Раббы, ана карынында сине бар иткән Раббы болай ди: «Мин — Раббы, һәммә нәрсәне Бар итүче, Мин берүзем күкләрне түшәдем, һичбер ярдәмчесез җирне җәеп җибәрдем.

²⁵Ялган пәйгамбәрләр күрсәткән билгеләрне юкка чыгарам, күрәзәчеләрнең акылсызлыкларын фаш итәм, акыл ияләрен җиңеп чыгам, аларның белемнәрен ахмаклыкка әйләндерәм,

²⁶Үз колымның сүзен раслыйм, Үз илчеләрем әйткәнне тормышка ашырам, Иерусалим турында: „Анда кешеләр китереп урнаштырырмын“, — дим, Яһүдә калалары турында: „Алар яңадан төзелер, хәрабәдән калкып чыгар“, — дим,

²⁷тирән суларга: „Кибегез! Мин сезнең ташкын суларны киптерәм“, — дим,

²⁸Кир турында: „Ул — Минем көтүчем, һәм ул Минем ихтыярымны үтиячәк“, — дим, Иерусалим хакында: „Ул яңадан төзеләчәк!“, Аллаһы йорты хакында: „Ул кабат тергезеләчәк!“ — дип әйтәм».