Read Изге Язма, 2015 Ишагыйя 48 Bible Online

Ишагыйя 48 - Изге Язма, 2015 bible

Ишагыйя 48

¹Тыңлагыз, Исраил исемен йөртүчеләр, Яһүдәнең нәсел варислары — Ягъкуб угыллары! Сез Раббы исеме белән ант итәсез, Исраил Алласын чакырасыз, ләкин тугрылык вә тәкъвалыктан ерак торасыз.

²Шулай, сез үзегезне изге кала исеме белән атыйсыз, Исраил Алласына таянасыз, Аның исеме — Күкләр Хуҗасы Раббы!

³Ул болай ди: «Булып узган вакыйгалар турында Мин алдан ук әйтеп куйган идем — ул сүзләр Минем авыздан чыкты; Мин игълан иттем һәм тормышка да ашырдым, барысын кинәттән эшләдем.

⁴Үҗәт халык икәнеңне, муеныңның — тимердән, маңгаеңның бакырдан булуын белдем Мин синең.

⁵Шуңа күрә боларны сиңа күпкә алдан белдердем, соңыннан син: „Илаһым эшләде моны, агачтан ясалган, коеп эшләнгән сыннарым шулай билгеләде“, — дип әйтмәсен өчен, алдан хәбәр итеп куйдым.

⁶Син бу хакта ишеттең — инде менә карап бак! Моның хак булуын танымыйсыңмы? Хәзер исә Мин сиңа яңа, син белмәгән яшерен нәрсәләр хакында белдерәм.

⁷Болар элек булмады, хәзер генә гамәлгә аша. Бүгенгә кадәр син бу хакта ишетмәдең, „Мин инде моны белә идем“, — дип әйтә алмыйсың.

⁸Син ишетмәдең дә, белмәдең дә, колагың күптәннән томаланган инде синең. Мин синең хыянәтче икәнеңне белә идем; туганнан алып фетнәче дип йөрттеләр сине.

⁹Ачуымны Мин Үз исемем хакына бастырып киләм, Үземне дан-шөһрәтем хакына тыеп киләм — сине юк итмим.

¹⁰Менә, Мин сине утта эретеп чистарттым, ләкин көмеш кебек итеп түгел — Мин сине газап учагына салып сынадым.

¹¹Моны Мин Үземнең хакка эшлим, чөнки Минем исем мәсхәрәгә калырга тиеш түгел! [85] Үземнең дан-шөһрәтемне Мин икенче берәүгә бирмәячәкмен!

¹²Тыңла әле Мине, Ягъкуб йорты, Үзем сайлап алган Исраил халкы! Бу — Мин, беренче һәм соңгысымын!

¹³Минем кулым җиргә нигез салды, һәм Минем уң кулым күкләрне түшәде — Мин чакыруга, алар бергәләп торып басачак.

¹⁴Һәммәгез җыелыгыз һәм тыңлагыз: пот-сыннар арасыннан кем моны алдан әйтә алды?! Раббының сөекле кешесе [86] Бабилгә кагылышлы Раббы ихтыярын тормышка ашырачак, үз кулы белән килданиләргә каршы көрәшәчәк.

¹⁵Алдан Мин әйттем моны, Мин! Аны чакырып алучы да Мин! Аны Мин китердем, һәм ул җиңәчәк!

¹⁶Килегез яныма, тыңлагыз Мине: Мин баштан ук яшереп сөйләмәдем; бу вакыйгалар башланганда, Мин шунда идем инде». «Хәзер Хуҗа-Раббы мине [87] вә Үзенең Рухын җибәрә!»

¹⁷Коткаручы Раббы, Исраил халкының изге Алласы, болай ди: «Мин — Раббы, синең Аллаң, синең файдаңа өйрәтүчемен, сине барыр юлыңа бастыручымын.

¹⁸Минем әмерләремә колак салсаң икән! Шул чагында бәхетең елга булып агар, бәрәкәтең диңгез дулкыннары сыман мул булыр иде.

¹⁹Токымнарың ком бөртекләре сыман ишле, синнән туган балалар ком бөртекләре санынча хисапсыз булыр иде; аларның исеме сызып ташланмас, Минем алда юкка чыкмас иде».

²⁰Бабилдән чыгыгыз, килданиләрдән качыгыз! Бу хакта кычкырып игълан итегез, җир читенә кадәр хәбәр таратыгыз: «Раббы Үзенең колы Ягъкубны йолып алды!» — дип әйтегез.

²¹Исраилиләрне Ул чүлдән алып барганда, сусаудан газап чикмәде алар. Ул аларга суны таштан агызып бирде: кыяны ярды, һәм аннан су бәреп чыкты.

²²«Явызларга тынычлык юк!» — ди Раббы.