Read Изге Язма, 2015 Ишагыйя 7 Bible Online

Ишагыйя 7 - Изге Язма, 2015 bible

Ишагыйя 7

¹Уззиядән туган Иотамның углы — Яһүдә патшасы Әхәз идарә иткән көннәрдә, Арам патшасы Рәсин һәм Исраил патшасы Ремалия углы Пеках Иерусалимгә каршы яуга чыктылар, ләкин аны ала алмадылар.

²Патшалык итүче Давыт йортына «Арам белән Эфраим [10] үзара килешү төзегәннәр! [11]» дигән хәбәр килеп ирешкәч, Әхәз патша һәм аның халкы урмандагы агачлар кебек калтыранды.

³Шунда Раббы Ишагыйягә болай диде: — Углың Шеар-Яшуб [12] белән бергә Әхәзне каршыларга чык. Ул Югары буаның суүткәргече беткән урында, Йон юучылар басуында, юлда тора.

⁴Әйт аңарга: «Күзәтеп тор һәм бер дә борчылма! Курыкма пыскып яткан шушы ике кисәү башыннан, арамиләр патшасы Рәсиннең һәм Ремалия углының ярсуын күреп рухың сүнмәсен!

⁵Эфраимнәр һәм Ремалия углы белән бергә арамиләр сиңа явызлык кылмакчы була,

⁶„Әйдәгез, Яһүдәгә һөҗүм итик! Халкын хафага төшереп, аны яулап алыйк! Табеил углын шунда патша итеп куйыйк!“ — ди алар».

⁷Ләкин Хуҗа-Раббы болай дип әйтә: «Бу эш барып чыкмас, тормышка ашмас.

⁸Чөнки Арамның башкаласы — Дәмәшкъ, ә Дәмәшкънең башында — Рәсин патша. Алтмыш биш елдан Эфраим җимерелер һәм халык булудан туктар.

⁹Эфраимнең башкаласы — Самарея, ә Самареянең башы — Ремалия углыдыр. Әгәр сез ныклап ышанмыйсыз икән, бөтенләй дә каршы тора алмассыз».

¹⁰Раббы, сүзен дәвам итеп, Әхәзгә болай диде:

¹¹— Раббы Аллаңнан билге бирүен сора. Бу билге үлеләр дөньясыннан яисә күкләр биеклегеннән булса да ярый.

¹²Әхәз: — Юк, сорамыйм, Раббыны сынамыйм, — диде.

¹³Шунда Ишагыйя: — Әй син, патшалык итүче Давыт йорты, тыңла! Кешеләрнең түземлеген сынавың гына җитмәгән, инде Алламның түземлеген сынамакчы буласыңмы?!

¹⁴Инде Хуҗа-Хаким Үзе сиңа билге бирә: менә, кыз кеше, авырга калып, угыл табачак һәм аңа Иммануил [13] дип исем кушачак.

¹⁵Явызлыкны кире кагып, яхшылыкны сайлап алырга өйрәнгәнгә кадәр бу бала эремчек вә бал белән тукланачак.

¹⁶Ул, явызлыкны кире кагып, яхшылыкны сайлап алырга өйрәнгәнгә кадәр син куркып торган теге ике патшаның җирләре бушап калачак.

¹⁷Раббы сиңа, халкыңа һәм атаң йортына Эфраим Яһүдәдән аерылганнан бирле күрелмәгән көннәр җибәрә: Ашшур патшасы килә.

¹⁸Ул көнне Раббы Мисыр елгасының ерак култыкларыннан чебеннәрне һәм Ашшур җиреннән бал кортларын сызгырып чакырачак.

¹⁹Алар, күч-күч булып очып килеп, чокыр-үзәннәрне вә кыя ярыкларын, барлык чәнечкеле куакларны, сугару урыннарын сырып алачак.

²⁰Фырат елгасының аръягыннан ялланган пәке, ягъни Ашшур патшасы белән Хуҗа-Хаким ул көнне башыгызны вә тәнегездәге төкне кырачак, хәтта сакалыгызны да кырып алачак.

²¹Яшь сыер һәм ике сарык асраган кеше шул көнне

²²мул сөттән эремчек ашаячак; бу җирдә исән калган һәммә кеше эремчек вә бал белән тукланачак.

²³Ул көнне мең шәкыл [14] көмеш белән бәяләнгән мең тармаклы йөзем үскән һәр урынны күгән һәм чәнечкеле куак басачак.

²⁴Шул җирләрдә ук-җәя белән коралланган аучылар гына йөриячәк.

²⁵Күгән вә чәнечкеле куаклардан куркып, кайчандыр китмән белән эшкәртелгән үр җирләргә дә беркем бармаячак, анда үгезләр утлап йөриячәк, ул җирне вак терлек таптаячак, — диде.