Read Изге Язма, 2015 Ишагыйя 8 Bible Online

Ишагыйя 8 - Изге Язма, 2015 bible

Ишагыйя 8

¹Раббы миңа әйтте: — Язар өчен зур такта ал да шунда ачык итеп «Маһер-Шалал-Хаш-Баз» [15] дип язып куй.

²Шаһит итеп рухани Урияне вә Әбәрәхия углы Зәкәрияне чакыр.

³Шулай, мин үземнең пәйгамбәр хатыным белән якынлык кылдым, һәм ул, авырга калып, миңа угыл табып бирде. Раббы миңа әйтте: — Аңа Маһер-Шалал-Хаш-Баз дип исем куш,

⁴чөнки бала «әткәй», «әнкәй» дип әйтергә өйрәнгәнче, Ашшур патшасы Дәмәшкънең байлыгын вә Самареядә таланган малны үзе белән алып китәчәк.

⁵Раббы миңа тагын әйтте:

⁶«Бу халык тын гына агып яткан Шилуах суларын санга сукмаган һәм Рәсин белән Ремалия углына сокланган өчен,

⁷Хуҗа-Хаким аңа каршы Фырат елгасының көчле-мул ташкынын — Ашшур патшасын — бөтен көч-гайрәте белән юнәлтәчәк. Шушы „елга“, үзенең бөтен тармакларын тутырып, ярларыннан ташып чыгачак;

⁸Яһүдә җиренә җәелеп, сулар муенга җитәчәк. Ашшур патшасының җәелгән канатлары җиреңне иңләп-каплап алачак, и Иммануил!»

⁹Тупланыгыз, әй халыклар, куркудан дер калтырагыз! Тыңлагыз, барлык ерак җирләр! Сугышка әзерләнегез, куркудан дер калтырагыз! Сугышка әзерләнегез, куркудан дер калтырагыз!

¹⁰Киңәшләшегез, тик сезнең ниятләрегез җимереләчәк, сүз берләшегез, тик бу файда китермәячәк. Чөнки Аллаһы безнең белән!

¹¹Үзенең нык кулы белән мине тотып һәм бу халыкның юлыннан йөрмәскә кисәтеп, Раббы миңа болай диде:

¹²«Бу халык яшерен эш дип атаганны яшерен дип санамагыз, ул курыккан нәрсәдән курыкмагыз, котыгыз алынмасын.

¹³Күкләр Хуҗасы Раббыны изге дип ихтирам итегез, Аңардан гына куркыгыз, Аңардан гына котыгыз алынсын!

¹⁴Ул изгедер, әмма Исраилнең ике патшалыгын да абындыра торган таш, сөрлектерә торган кыя, Иерусалим кешеләре өчен капкын вә тозак булачак.

¹⁵Халыкның күбесе абыначак, егылып яраланачак, тозакка эләгеп тотылачак.

¹⁶Шушы сүзләр язылган таныклыкны бәйләп куй, шәкертләрем алдында нәсыйхәтемә мөһер сук».

¹⁷Ягъкуб нәселеннән йөзен яшергән Раббыга өметләнәм һәм ышанам мин!

¹⁸Менә мин һәм миңа Раббы биргән балалар; без — Сион тавында яшәүче Күкләр Хуҗасы Раббыдан Исраилгә җибәрелгән билге-галәмәттер.

¹⁹Сезгә: «Әрвахларның рухын чакыручылардан, пышылдаучы һәм әфсенләүче күрәзәчеләрдән сорагыз», — дип әйткәндә: «Халык үзенең Алласыннан сорарга тиеш түгелме соң?! Тереләр турында үлеләрдән сорыйлармыни?!» — дип җавап бирегез.

²⁰Аллаһы канунына вә күрсәтмәләренә мөрәҗәгать итегез. Шулар буенча сөйләмәгән кешеләр өчен таң атмас.

²¹Алар төшенкелеккә бирелеп, ач килеш ил буйлап каңгырып йөрерләр; ачлыктан тәмам интеккәннән соң, ярсып, үзләренең патшасына һәм Алласына каргыш яудырырлар. Күзләрен күккә төбәсәләр дә,

²²җиргә карасалар да, бар җирдә шул бер үк нәрсә — кайгы-хәсрәт, күңелне изә торган караңгылык күрерләр; аларны әнә шунда ташларлар. Әмма изелгәннәр өчен караңгылык булмаячак!