Read Изге Язма, 2015 Левиләр 17 Bible Online

Левиләр 17 - Изге Язма, 2015 bible

Левиләр 17

¹Раббы, Мусага дәшеп, болай диде:

²— Һарунга, аның угылларына һәм барлык исраилиләргә игълан ит: «Раббы менә шундый әмер бирде:

³3-4 Исраил халкы арасыннан кем дә булса станда яки станнан читтә сыер, сарык яисә кәҗә чала икән һәм аны Очрашу чатыры алдына, Раббы чатыры каршына Раббыга корбан итеп китерми икән, ул кеше кан коюда гаепләнсен. Андый кеше үз халкыннан читләштерелергә тиеш, чөнки ул — кан түгүче.

⁵Шуның өчен исраилиләр үз корбаннарын, яланда чалмыйча, Очрашу чатыры алдына, Раббы каршына, руханига китерсеннәр һәм татулык корбаны итеп тәкъдим итсеннәр.

⁶Ә рухани исә канны Очрашу чатыры алдындагы Раббы мәзбәхенә чәчрәтсен һәм, хуш исен Раббы алдында чыгарырлык итеп, майны яндырсын.

⁷Моннан ары исраилиләр үзләренең корбаннарын кәҗә кыяфәтендәге потларга китермәскә — Раббыга хыянәт итмәскә тиешләр. Бу — аларга һәм аларның киләчәк буыннарына мәңгелек кагыйдә».

⁸ 8-9 Аларга тагын шуны игълан ит: «Исраилиләрнең яисә алар арасында яшәүче килмешәкләрнең берәрсе тулаем яндыру корбаны яки башка бүләк китерсә, әмма моны, Раббыга корбан китергәндәй, Очрашу чатыры алдында эшләмәсә, андый кеше үз халкыннан читләштерелергә тиеш.

¹⁰Әгәр исраилиләрнең яки алар арасында яшәүче килмешәкләрнең берәрсе кан ашый икән, Мин андый кешегә каршы чыгачакмын һәм аны үз халкыннан читләштерәчәкмен.

¹¹Чөнки һәр тәннең җаны — канында. Шуңа күрә Мин, сезнең җаннарыгыз гөнаһтан арынсын өчен, канны мәзбәхкә китерергә куштым — кан җанны гөнаһтан арындыра.

¹²Менә шуның өчен Мин исраилиләргә болай дидем: „Сез үзегез дә, арагызда яшәүче килмешәкләр дә кан ашарга тиеш түгел“.

¹³Исраилиләрнең яки алар арасында яшәүче килмешәкләрнең берәрсе ау вакытында ашарга яраклы хайван яки кош тота икән, ул аның канын агызып бетерергә һәм канны туфрак белән күмәргә тиеш.

¹⁴Чөнки һәр тәннең җаны — канында. Менә шуның өчен Мин исраилиләргә: „Һичнинди тәннең канын ашамагыз, чөнки һәр тәннең җаны — канында, — дидем, — кан ашаган һәр кеше үз халкыннан читләштерелергә тиеш“.

¹⁵Үлгән яки ерткыч җанвар ботарлаган җәнлек итен ашаган теләсә кем — җирле кешеме ул яисә килмешәкме — киемнәрен дә юарга, үзе дә юынырга тиеш, һәм ул кичкә кадәр нәҗес саналыр, шуннан соң чиста булыр.

¹⁶Әлеге кеше үзенең киемнәрен һәм тәнен юмаса, җәзага тартылырга тиеш».