Read Изге Язма, 2015 Левиләр 18 Bible Online

Левиләр 18 - Изге Язма, 2015 bible

Левиләр 18

¹Раббы, Мусага дәшеп, болай диде:

²— Исраилиләргә игълан ит: «Мин — сезнең Раббы Аллагыз.

³Әүвәле үзегез яшәгән Мисыр җирендәге гадәтләрне, Мин сезне алып барачак Кәнган җирендәге гадәтләрне кабатламагыз, аларның йолалары буенча яшәмәгез.

⁴Минем кануннарымны һәм кагыйдәләремне саклап, шулар белән гамәл кылыгыз. Мин — сезнең Раббы Аллагыз.

⁵Минем кагыйдәләремне һәм кануннарымны җиренә җиткереп үтәгез, аларны үтәгән кеше тереклек итәчәк. Мин — Раббы.

⁶Сезнең арадан берәү дә үзенең кыз кардәше белән якынлык кылырга тиеш түгел. Мин — Раббы.

⁷Анаң белән якынлык кылып, үз атаңны хурлыкка төшермә. Ул — синең анаң, аның белән якынлык кылма.

⁸Үги анаң белән якынлык кылма — атаңны хурлыкка төшермә.

⁹Үзеңнең кыз кардәшең, ягъни атаңның кызы белән дә, анаңның кызы белән дә якынлык кылма. Син яшәгән өйдә туу-тумавына карамастан, кыз кардәшең белән якынлык кылма.

¹⁰Кыз оныгың белән якынлык кылма — үзеңне хурлыкка төшермә.

¹¹Атаңның кызы — аның хатынының кызы белән якынлык кылма, чөнки ул — синең кыз кардәшең.

¹²Атаңның кыз туганы белән якынлык кылма, чөнки ул — синең атаңның кан кардәше.

¹³Анаңның кыз туганы белән якынлык кылма, чөнки ул — синең анаңның кан кардәше.

¹⁴Атаңның бертуган абыйсын хурлыкка төшермә: аның хатынына якынаеп, аның белән якынлык кылма, чөнки ул — синең якын апаң.

¹⁵Үз киленең белән якынлык кылма. Ул — синең углыңның хатыны, аның белән якынлык кылма.

¹⁶Бертуганыңны хурлыкка төшермә: аның хатыны белән якынлык кылма.

¹⁷Хатын алсаң, аның кызы яки кыз оныгы белән якынлык кылма: алар хатыныңның кан кардәшләре; бу — бозыклык.

¹⁸Хатының исән икән, аңа көндәш итеп бертуган сеңлесен хатын итеп алма һәм аның белән якынлык кылма.

¹⁹Хатыныңның күрем килү вакытында, аңа якынаеп, аның белән якынлык кылма.

²⁰Иптәшеңнең хатыны белән якынлык кылма, юкса бу сине нәҗесләячәк.

²¹Балаларыңның берсен дә Молых илаһына багышлап корбан итмә, шуның белән Аллаңның исемен хур итмә. Мин — Раббы.

²²Хатын-кыз белән якынлык кылган кебек, ир-ат белән якынлык кылма; бу — кабахәтлек.

²³Нинди дә булса хайван белән якынлык кылма, шуның белән үзеңне нәҗесләмә. Хатын-кыз да, хайван янына килеп, аның белән якынлык кылырга тиеш түгел; бу — кабахәтлек.

²⁴Мондый эшләр белән үзегезне нәҗесләмәгез, чөнки яныгыздан Мин куып җибәрәчәк халыклар моңарчы шундый эшләре белән үзләрен нәҗесләде инде.

²⁵Хәтта җирләре дә нәҗесләнде; шуңа күрә Мин халкының гөнаһы өчен җирне җәзаладым, һәм ул үзендә яшәүчеләрне читкә какты.

²⁶Ә сез Минем кагыйдәләремне һәм кануннарымны сакларга тиеш. Сез — җирле кешеләр дә, сезнең арагызда яшәүче килмешәкләр дә — мондый кабахәтлекләрне эшләргә тиеш түгел.

²⁷Чөнки мондый кабахәтлекләрне шушы җирдә яшәүчеләр эшләделәр инде, һәм шуның нәтиҗәсендә җирләре дә нәҗесләнде.

²⁸Әгәр шушы җирне нәҗесләсәгез, ул, сездән элек яшәгән халыкларны үзеннән кире каккан кебек, сезне дә кире кагачак.

²⁹Әгәр кем дә булса берәү мондый кабахәтлекләрне эшли икән, ул кеше үз халкыннан читләштерелергә тиеш.

³⁰Шуңа күрә Минем күрсәтмәләремне үтәгез, бу җирдә сездән элек яшәгәннәрнең кабахәтлекләрен кабатламагыз һәм шулар белән үзегезне нәҗесләмәгез. Мин — сезнең Раббы Аллагыз».