Read Изге Язма, 2015 Левиләр 2 Bible Online

Левиләр 2 - Изге Язма, 2015 bible

Левиләр 2

¹Кем дә булса Раббыга икмәк бүләге китерергә тели икән, аның бүләге сыйфатлы бодай оны булсын. Онга зәйтүн мае салынсын, шуның өстенә хуш исле сумала-майлар куелсын.

²Аны Һарунның угылларына — руханиларга китерсен. Рухани, уч тутырып, он белән май, шулай ук хуш исле сумала-майның барысын алсын да, бүләкнең бер өлеше буларак, мәзбәхтә яндырсын. Бу — Раббыга багышланган яндыру бүләге; аның тәмле исе Раббы күңеленә хуш килер.

³Ә инде икмәк бүләгенең артып калганы Һарун һәм аның угылларына булсын. Бу — Раббыга багышланган яндыру бүләгенең иң изге өлеше.

⁴Әгәр мичтә пешкән икмәк бүләге китерәсең икән, ул, сыйфатлы бодай оныннан пешерелеп, зәйтүн мае кушылган төче күмәч яисә зәйтүн мае белән майланган юка төче көлчә булсын.

⁵Әгәр бүләгең табада пешкән булса, ул, сыйфатлы бодай оныннан пешерелеп, зәйтүн мае кушылган төче икмәк булсын.

⁶Аны сындыргала да өстенә май сал. Бу — икмәк бүләге.

⁷Әгәр икмәк бүләге чүлмәктә пешкән булса, ул сыйфатлы бодай оныннан зәйтүн мае кушып пешерелсен.

⁸Шулай итеп әзерләнгән икмәк бүләген Раббыга китер, аны руханига тәкъдим ит. Рухани, аны мәзбәхкә китереп,

⁹күпмесендер аерып алсын да шуны, бүләкнең бер өлеше буларак, мәзбәхтә яндырсын. Бу — Раббыга багышланган яндыру бүләге; аның тәмле исе Раббы күңеленә хуш килер.

¹⁰Ә икмәк бүләгенең калган өлеше Һарун һәм аның угылларына булыр. Бу — Раббыга багышланган яндыру бүләгенең иң изге өлеше.

¹¹Раббыга китерелә торган бер генә икмәк бүләген дә чүпрә кушып пешермә, чөнки Раббыга багышлап яндырыла торган бүләктә чүпрә дә, бал да булырга тиеш түгел.

¹²Раббыга боларны беренче уңыш бүләге итеп китерергә мөмкин, әмма бүләкне, хуш исен чыгарырлык итеп, мәзбәхтә яндырырга ярамый.

¹³Үзеңнең барлык икмәк бүләкләреңә тоз сал, чөнки тоз — Аллаһы белән синең арада төзелгән килешүнең билгесе. Шуңа күрә тозсыз икмәк бүләген тәкъдим итмә, һәр бүләгең белән бергә тоз да китер.

¹⁴Беренче уңышларыңнан Раббыга икмәк бүләге китерәсең икән, аны беренче башаклардан китер, ул ашлык бөртеге кыздырылган, төелгән булсын.

¹⁵Аның өстенә зәйтүн мае сал, хуш исле сумала-майлар куй; менә бу — икмәк бүләге.

¹⁶Рухани бөртек белән майның күпмесендер алсын һәм, бүләкнең бер өлеше буларак, барча хуш исле сумала-майлар белән бергә яндырсын. Бу — Раббыга багышланган яндыру бүләге.