Read Изге Язма, 2015 Левиләр 21 Bible Online

Левиләр 21 - Изге Язма, 2015 bible

Левиләр 21

¹Раббы Мусага болай диде: — Һарун угылларына — руханиларга игълан ит: «Туган-тумачасының мәетенә якынлашып, рухани үзен нәҗесләргә тиеш түгел.

²Ул үзенең якыннарына — ата-анасына, угыл-кызларына, ир туганына

³һәм үзе белән яшәүче, әмма кияүгә чыкмаган кыз туганына гына якынлаша, алар хакына үзен нәҗесли ала.

⁴Хатынының туганнары дип, ул үзен нәҗесләргә тиеш түгел.

⁵Рухани үзенең чәчен кырмасын, сакалын кыскартмасын, тәненә җәрәхәтләр ясамасын [10].

⁶Рухани үз Алласының изгесе булырга һәм Аллаһы исемен хурламаска тиеш, чөнки Раббыга багышланган яндыру бүләген, ягъни Аллаһының ризыкларын тәкъдим итә ул. Шулай булгач, ул изге булырга тиеш.

⁷Рухани үзенә хатын итеп азгын фахишәне, шулай ук иреннән аерылган хатынны алмаска тиеш, чөнки рухани — үз Алласының изгесе.

⁸Аллаһыга ризык тәкъдим иткән руханины изге дип белегез; аларны изге дип хөрмәтләгез, чөнки Мин, сезне изге итүче Аллаһы, изгемен.

⁹Әгәр руханиның кызы, фәхешлек кылып, үзен нәҗесли икән, ул үзенең атасын хур итә, һәм ул кыз яндырып үтерелергә тиеш.

¹⁰Туганнары арасыннан баш рухани итеп сайланган, башына изгеләндерү мае сөртелгән, рухани киемнәре киеп йөргән адәм үзенең чәчләрен тузгытырга һәм киемнәрен ертырга тиеш түгел.

¹¹11-12 Мәет булган йортка бару өчен, Изге чатырны калдырып китеп, бу рухани чатырны нәҗесләмәсен; хәтта атасы яки анасы үлгән очракта да, ул үзен нәҗесләргә тиеш түгел, чөнки ул, Алласының изгеләндерү мае белән майланып, Раббыга багышланган. Мин — Раббы.

¹³Ул бары тик гыйффәтле кызга гына өйләнергә тиеш.

¹⁴Тол яки иреннән аерылган яисә азгын фахишәгә өйләнергә тиеш түгел; фәкать үз халкыннан булган гыйффәтле кызга гына өйләнсен.

¹⁵Үз халкы арасында ул үзенең нәсел варисларын нәҗесләмәскә тиеш. Мин — Раббы, баш руханины изге итүче».

¹⁶Раббы Мусага болай диде:

¹⁷— Һарунга әйт: «Гәүдә-сынында кимчелеге булган нәсел варисларыңнан берәү дә, үзенең Алласына ризык тәкъдим итәргә дип, һичкайчан Аның хозурына килергә тиеш түгел.

¹⁸Тән-бәдәнендә кимчелеге булган бер кеше дә — сукыр, аксак, йөзе чалшайган, бер аягы яки кулы озынрак булган,

¹⁹аягы яки кулы сынган,

²⁰бөкре, кәрлә, күзенә ак төшкән, кутырлы, корчаңгы, күкәе бозылган,

²¹рухани Һарунның нәсел варисларыннан тәнендә җитешсезлек булган бер генә кеше дә, Раббыга багышланган яндыру бүләге китерү өчен, Аның янына килергә тиеш түгел. Ул — кимчелекле кеше, шуңа күрә, үз Алласына ризык тәкъдим итәргә дип, Аның янына килмәсен.

²²Андый кеше Аллаһының ризыгын — Аңа китерелгән изге вә иң изгеләрдән саналган бүләкләрне ашый ала,

²³әмма чатыр эчендәге пәрдә янына яки мәзбәхкә якынаерга тиеш түгел, чөнки ул — кимчелекле. Андый кеше Минем изге урынымны нәҗесләргә тиеш түгел. Мин — Раббы, руханиларны изге итүче».

²⁴Муса боларны Һарунга, аның угылларына һәм барча исраилиләргә игълан итте.