Read Изге Язма, 2015 Левиләр 24 Bible Online

Левиләр 24 - Изге Язма, 2015 bible

Левиләр 24

¹Раббы Мусага болай диде:

²— Яктырткычлар һәрвакыт янып торсын өчен, сыйфатлы зәйтүн мае китерегез, дип исраилиләргә әмер ит.

³Очрашу чатырының Боерыклар сандыгы куелган бүлмәсен аерып торучы пәрдәнең тышкы ягындагы яктырткычлар Раббы каршында кичтән алып иртәнгә кадәр янсын өчен, Һарун аларны һәрвакыт күзәтеп торырга тиеш. Сезнең киләчәк буыннар өчен бу — мәңгелек кагыйдә.

⁴Раббы алдындагы саф алтын шәмдәлгә куелган яктырткычларны Һарун һәрвакыт көйләп торырга тиеш.

⁵Сыйфатлы бодай оны алып, унике икмәк пешер; һәр икмәккә бер эфа онның уннан ике өлеше сарыф ителсен.

⁶Аларны Раббы алдындагы саф алтын белән капланган өстәлгә алтышардан ике рәт итеп тезеп куй.

⁷Һәр рәт өстенә хуш исле саф сумала-майлар куй; әлеге сумала-майлар, икмәк бүләгенең яндырыла торган өлеше буларак, Раббыга багышлансын.

⁸Һәр шимбә көнне бу икмәкләр Раббы алдына куелырга тиеш; бу — исраилиләрнең мәңгелек вазифасы.

⁹Ул икмәкләр Һарун белән аның угылларына була, һәм алар аны изге урында ашасыннар, чөнки бу — мәңгегә аларныкы, Раббыга багышланган яндыру бүләкләренең иң изгеләрдән саналган өлеше.

¹⁰Көннәрдән беркөнне бер исраили хатынның мисырлыдан туган углы станда яшәүче бер исраили белән ызгышып китте дә,

¹¹Раббы исемен хурлап, яман сүзләр әйтте. Шуңа күрә аны Муса янына алып килделәр. (Бу егетнең анасы Дан ыругыннан Дибри кызы Шеломит иде.)

¹²Раббыдан хөкем чыкканчы, аны сак астына алдылар.

¹³Шуннан соң Раббы Мусага болай диде:

¹⁴— Яман теллеләнгән кешене станнан читкә чыгар, аның хурлавын ишеткән кешеләр үзләренең кулларын шул кешенең башына куйсыннар, һәм бар халык аны таш атып үтерсен.

¹⁵Исраилиләргә игълан ит: «Кем дә булса үзенең Алласын хурлый икән, ул җәзага тартылырга тиеш.

¹⁶Раббының исемен хурлаучыны үлем җәзасы көтә: бар халык аны таш атып үтерсен. Раббы исемен хурлаучы — килмешәкме ул, җирле кешеме — үлемгә тапшырылсын.

¹⁷Әгәр берәр кеше кемне дә булса үтерә икән, аны үлем җәзасы көтә.

¹⁸Кем дә булса икенче бер кешенең хайванын үтерә икән, шуның бәрабәренә үзенең терлеген бирергә тиеш: җанга — җан.

¹⁹Берәүне имгәткән кешенең үзен дә имгәтергә кирәк:

²⁰сөяккә — сөяк, күзгә — күз, тешкә — теш. Ул кеше нинди зыян салса, үзенә дә шундый ук зыян салынсын.

²¹Кем дә булса терлек үтерә икән, шуның өчен терлек белән түләргә тиеш. Әгәр инде берәү кеше үтерә икән, үзе дә үлем җәзасы алсын.

²²Килмешәкләр өчен дә, җирле кешеләр өчен дә канун бер булсын. Мин — сезнең Раббы Аллагыз».

²³Шуннан соң Муса моны исраилиләргә игълан итте. Теге яман теллеләнгән кешене, станнан читкә чыгарып, таш атып үтерделәр. Раббы Мусага ничек әмер иткән булса, исраилиләр шулай эшләде.