Read Изге Язма, 2015 Левиләр 7 Bible Online

Левиләр 7 - Изге Язма, 2015 bible

Левиләр 7

¹Гаеп йолу корбанын — иң изге корбанны китерүнең кагыйдәләре менә мондый:

²гаеп йолу өчен китерелгән корбанлык мал тулаем яндыру корбаны чалына торган урында чалынсын, ә рухани аның канын мәзбәхнең һәр ягына чәчрәтсен.

³3-4 Аның бөтен маен — койрык маен, эчке әгъзаларын каплаган маен, ике бөерен, шулай ук бил янындагы маен һәм бавыр астындагы өлешен аерып алып китерсен.

⁵Ә рухани аларны, Раббыга багышланган яндыру бүләге итеп, мәзбәхтә яндырсын. Бу — гаеп йолу корбаны.

⁶Рухани нәселеннән булган һәр ир кеше аны ашый ала; ул изге урында ашалырга тиеш, чөнки бу иң изге корбаннардан санала.

⁷Гөнаһ йолу корбаны өчен дә, гаеп йолу корбаны өчен дә кагыйдә бертөрле; корбан ите — корбан китерүче руханиныкы.

⁸Тулаем яндыру корбанын китерүче рухани малның тиресен дә үзенә алсын.

⁹Мичтә, чүлмәктә яки табада пешкән һәртөрле икмәк бүләге — корбан китерүче руханиныкы.

¹⁰Май кушылган яки кушылмаган һәртөрле икмәк бүләге — Һарун угылларыныкы, һәм ул алар арасында тигез итеп бүленсен.

¹¹Раббыга тәкъдим ителә торган татулык корбанын китерү кагыйдәләре менә мондый:

¹²әгәр кем дә булса татулык корбанын рәхмәт әйтү йөзеннән китерә икән, шуңа өстәп зәйтүн мае кушылган төче икмәкләр, зәйтүн мае белән майланган юка төче көлчәләр һәм, зәйтүн мае кушып, сыйфатлы бодай оныннан пешергән икмәкләр китерсен;

¹³рәхмәт әйтү йөзеннән китерелгән татулык корбаны белән бергә ачыткы салып пешергән икмәк тә китерсен;

¹⁴һәртөрле икмәк бүләгенең бер өлешен Раббыга багышлап китерсен; ул өлеш — татулык корбанының канын мәзбәхнең һәр ягына чәчрәтүче руханиныкы.

¹⁵Рәхмәт әйтү йөзеннән китерелгән татулык корбанының ите тәкъдим ителгән көнне үк ашалырга тиеш, аны иртәнгә калдырырга ярамый.

¹⁶Әгәр кем дә булса әйткән нәзере буенча яисә ихтыяри рәвештә корбан китерә икән, корбан итен тәкъдим ителгән көнне дә, икенче көнне дә ашарга ярый.

¹⁷Өченче көнгә калган корбан ите яндырылырга тиеш.

¹⁸Татулык корбанының ите өченче көнне дә ашала икән, бу корбан Раббы тарафыннан кабул ителмәс, һәм корбан китерүчегә аның савабы булмас — бу инде нәҗес ит санала, һәм аны ашаучы җәзага тартылсын.

¹⁹Корбан итенә нинди дә булса нәҗес нәрсә тисә, аны ашарга ярамый, ул ит яндырылырга тиеш. Корбан итен пакь кеше генә ашый ала.

²⁰Әгәр дә нәҗесләнгән берәр кеше Раббының татулык корбаны итен ашый икән, андый кеше үз халкыннан читләштерелергә тиеш.

²¹Әгәр берәү кеше нәҗеслегенә, чиста булмаган хайванга яисә ниндидер нәҗеслеккә кагылса һәм Раббының татулык корбаны итен ашаса, андый кеше үз халкыннан читләштерелергә тиеш».

²²Раббы Мусага болай диде:

²³— Исраилиләргә игълан ит: «Сыер маен да, сарык маен да, кәҗә маен да ашамагыз.

²⁴Үлгән яки ерткыч җанвар ботарлаган терлекнең маен төрле кирәк-яракка файдаланырга мөмкин, әмма аны ашарга ярамый.

²⁵Әгәр кем дә булса Раббыга яндыру корбаны итеп китерелгән малның маен ашый икән, андый кеше үз халкыннан читләштерелергә тиеш.

²⁶Кайда гына яшәсәгез дә, кош канын да, хайван канын да ашамагыз.

²⁷Кан ашаган кеше үз халкыннан читләштерелергә тиеш».

²⁸Раббы Мусага болай диде:

²⁹— Исраилиләргә игълан ит: «Раббыга багышланган татулык корбаны китерүче кеше шул корбанның бер өлешен Раббыга китерсен.

³⁰Раббыга яндыру корбанын ул үз кулы белән китерсен — корбан малының маен түш ите белән бергә аерып алсын да, Раббыга багышлануын күрсәтер өчен, түш итен Аның алдында күтәреп селкесен.

³¹Рухани корбанның маен мәзбәхтә яндырсын, ә түш ите Һарунга һәм аның угылларына булсын.

³²Татулык корбанының арткы уң боты руханига бүләк итеп бирелсен.

³³Корбан малының арткы уң боты — корбанлыкның канын һәм маен Раббыга китерүче Һарун углының өлешедер.

³⁴Татулык корбанының күтәреп селкегән түш итен һәм тәкъдим ителгән арткы уң ботын Мин, Исраил халкыннан алып, рухани Һарунга һәм аның угылларына бирәм. Бу — Исраил халкыннан аларга һәрчак бирелә торган өлеш».

³⁵Һарун һәм аның угыллары Раббы алдында рухани булып хезмәт итәр өчен тәгаенләнгән көннән башлап, Раббыга китерелгән яндыру бүләкләреннән аларга тиешле өлеш әнә шул.

³⁶Һарун һәм аның угылларына май сөртелгән көнне Исраил халкына Раббы: «Бу өлеш буыннан-буынга аларга бирелергә тиеш», — дип әмер итте.

³⁷Тулаем яндыру корбаны, икмәк бүләге, гөнаһ йолу корбаны, гаеп йолу корбаны, руханилыкка багышлау корбаны һәм татулык корбаны китерүнең кагыйдәләре әнә шундый.

³⁸Исраилиләр Раббыга корбаннар китерсен өчен, шушы кагыйдәләрне Раббы Мусага Синай чүлендәге Синай тавында белгертте.