Read Изге Язма, 2015 Иремия 1 Bible Online

Иремия 1 - Изге Язма, 2015 bible

Иремия 1

¹Беньямин җирендәге Анатот шәһәрендә яшәүче руханиларның берсе булган Хилкыйя углы Иремия сүзләре бу.

²Раббы сүзе аңа Яһүдә патшасы Амон углы Йошия хакимлегенең унөченче елында килеп иреште.

³Яһүдә илендә Йошия углы Яһоякыйм, аннары Йошия углы Сәдыкыйя патшалык иткән чорда, Сәдыкыйя хакимлегенең унберенче елына, елның бишенче аена кадәр — Иерусалим халкы үз җиреннән сөрелгәнче — Иремиягә Раббы сүзе ирешә торды.

⁴Миңа Раббы сүзе булды:

⁵«Мин сине анаң карынында бар иткәнче үк сайлап алган идем, анаң тудырганчы ук, бүтәннәрдән аерып куйган һәм халыклар өчен пәйгамбәр итеп билгеләгән идем», — диде Ул.

⁶Ә мин Аңа: — Йа Хуҗа-Раббым, матур итеп сөйли белмим бит мин, чөнки әле бик яшьмен, — дип җавап кайтардым.

⁷Ләкин Раббы миңа: «Син: „Мин яшьмен“, — дип әйтмә, чөнки кем янына җибәрсәм дә барырсың, нәрсә сөйләргә кушсам да сөйләрсең.

⁸Аларның берсеннән дә курыкма, чөнки Мин, сине саклар өчен, һаман яныңда булырмын, — диде. — Бу — Раббы сүзе».

⁹Шуннан соң Раббы, кулын сузып, иренемә тидерде дә: «Менә, сүзләремне Мин синең телеңә салдым, — диде. —

¹⁰Кара, бүгеннән Мин сине халыклар вә патшалыклардан өстен куям: берәүләрен син тамырлары белән йолкырсың, бөлгенлеккә төшерерсең, юкка чыгарырсың һәм җимерерсең, икенчеләрен ныгытырсың һәм төпләндерерсең».

¹¹Аннары Раббы: — Алдыңда нәрсә күрәсең, Иремия? — дип сорады. Мин: — Бадәм [1] агачының ботагын күрәм, — дип җавап бирдем.

¹²Раббы миңа: — Син дөрес күрәсең. Әйткән сүзем тормышка ашсын өчен, Мин күзәтеп торачакмын [2], — диде.

¹³Шуннан соң миңа тагын Раббы сүзе килеп иреште: — Алдыңда нәрсә күрәсең? Мин: — Төньяк тарафта кайнап торган бер казан күрәм, безгә таба авышкан ул казан түгелергә тора, — дип җавап бирдем.

¹⁴Раббы миңа: «Бу җирдә яшәүчеләр өстенә төньяктан афәт якынлаша, — дип әйтте. —

¹⁵Менә, Мин төньяк патшалыклардан бар халыкны чакырып алачакмын, — дип белдерә Раббы. — Алар, килеп, Иерусалим капкалары каршына ук тәхетләрен куячаклар, каланы уратып алган диварларга һәм Яһүдәнең барлык шәһәрләренә һөҗүм итәчәкләр.

¹⁶Мин, шулай итеп, Үз халкыма барлык явызлыклары өчен хөкем оештырачакмын, чөнки алар Миннән йөз чөерделәр, чит илаһларга багышлап, корбан яндырдылар, үз куллары белән ясаган потларга табындылар.

¹⁷Ә син билеңне әйбәтләп бу да әзерлән, урыныңнан тор һәм Мин кушканнарның барын да аларга җиткер. Син алардан курыкма, юкса алар күз алдында Мин сине Үзем дәһшәткә салачакмын.

¹⁸Менә, бүген Мин сине бөтен җиргә — Яһүдә патшаларына, аның түрәләренә, руханиларына һәм шул җирнең халкына каршы тора алырлык ныгытылган шәһәр, тимер багана, бакыр дивар итеп куям.

¹⁹Алар сиңа һөҗүм итәрләр, ләкин җиңә алмаслар, чөнки Мин, сине саклар өчен, яныңда булырмын. Бу — Раббы сүзе».