Read Изге Язма, 2015 Иремия 11 Bible Online

Иремия 11 - Изге Язма, 2015 bible

Иремия 11

¹Иремиягә Раббы сүзе килеп иреште:

²— Әлеге Килешүнең шартларын Яһүдә халкына, Иерусалимдә яшәүчеләргә җиткер!

³Син аларга болай диген: «Тыңлагыз! Күкләр Хуҗасы Раббы, Исраил Алласы, болай дип әйтә: „Бу Килешүнең шартларын үтәмәгән кешегә ләгънәт-каргыш төшәчәк!

⁴Сезнең ата-бабаларыгызны Мисырдан — тимер эретә торган мичтән алып чыккан чакта, ул шартлар турында аларга: ‘Мине тыңласагыз, Мин кушканнарны җиренә җиткереп үтәсәгез, сез — Минем халкым, ә Мин сезнең Аллагыз булырмын’, — дип әйткән идем.

⁵Мин, шулай итеп, сезнең ата-бабаларыгызга биргән антлы вәгъдәмне үтәдем — бүгенге көндә сез сөт вә бал агып торган шул җирләрдә яшәп ятасыз“». — Амин, Раббым! — дип җавап бирдем мин.

⁶Шуннан Раббы миңа болай диде: — Әйткән сүзләремнең һәммәсен Яһүдә шәһәрләрендә вә Иерусалим урамнарында игълан ит. «Әлеге Килешүнең шартларын тыңлап, аларны үтәгез! — диген. —

⁷Сезнең ата-бабаларыгызны Мисыр җиреннән алып чыкканнан башлап бүгенге көнгәчә Мин: „Кушканнарымны үтәгез!“ — дип кисәтә килдем.

⁸Ләкин алар сүзләремә колак салмады, әйткәннәремә игътибар итмәде, һәрберсе, үзенең явыз йөрәген тыңлап, үҗәтләнеп йөрде. Шуңа күрә Мин, Килешүне үтәргә кушып та, аны үтәмәгәннәре өчен, Килешүдә әйтелгән җәзаларның барын да аларга җибәрдем».

⁹Аннары Раббы миңа болай диде: — Яһүдә кешеләре вә Иерусалимдә яшәүчеләр бергәләп Миңа каршы фетнә оештырдылар.

¹⁰Алар Минем сүзләремә колак салмаган ата-бабаларының гөнаһларын кабатлыйлар, чит илаһларга ияреп китеп сәҗдә кылалар; Исраил вә Яһүдә халкының ата-бабалары белән Мин төзегән Килешүне бозалар.

¹¹Шуңа күрә Раббы болай ди: «Мин аларга котыла алмаслык бәла-каза җибәрәм! Алар Мине ярдәмгә чакырачак, ләкин Мин аларны тыңламаячакмын.

¹²Шул чагында Яһүдә шәһәрләре вә Иерусалим кешеләре, үзләре корбан китерә торган илаһлары янына барып, ярдәм сораячак, ләкин, бәла килгәндә, ул илаһлар коткара алмаячак.

¹³Яһүдә халкының шәһәрләре күпме булса, илаһлары да шуның кадәр. Иерусалимдә ничә урам булса, Багалга корбан яндыру мәзбәхләре дә шулар санынча».

¹⁴Син, Иремия, бу халык өчен Миңа дога кылма, алар өчен гозерләп сорама, чөнки, бәла килгәндә, Миңа ялварсалар да, Мин аларның сүзләренә колак салмаячакмын.

¹⁵«Әй сөекле халкым, күпме явызлыклар кылганнан соң, ни хакың бар Минем йортыма керергә?! „Киләсе афәттән корбан итләре коткарып калыр да, янә күңел ачып яшәрмен“, — дип уйлыйсыңмы?! [30]»

¹⁶Раббы сине «куе яфраклы, мул җимешле зәйтүн агачы» дип атаган иде, әмма, күкләр күкрәгәндә, Раббы ул агачка ут төртәчәк, һәм аның ботаклары харап булачак.

¹⁷Сине утырткан Күкләр Хуҗасы Раббы Үзе үк сине юк итәргә әмер бирде, чөнки Исраил вә Яһүдә халкы Багал хөрмәтенә корбаннар китереп явызлык кылды һәм шуның белән Раббының ачуын чыгарды.

¹⁸Раббы Үзе миңа ачып бирде, һәм мин хәбәрдар булдым: Ул миңа дошманнарымның явыз эшләрен күрсәтте.

¹⁹Ә мин чалырга алып барган юаш бәрән сыман булганмын, дошманнарым миңа каршы фетнә оештырганны белмәдем. «Әйдәгез, агачны җимешләре белән бергә юк итик, аны исәннәрдән аерып кисик, исеме дә телгә алынмасын», — дигән алар.

²⁰И Күкләр Хуҗасы Раббы, гадел Хөкемче, күңел вә акылны сынаучы, алардан ни рәвешле үч алуыңны үз күзләрем белән күрим, чөнки дәгъвамны мин Сиңа тапшырдым!

²¹Раббы миңа болай дип әйтте: — Әй Иремия, Анатот халкы, сине үтерергә ниятләп, сиңа: «Раббы исеменнән пәйгамбәрлек кылма, юкса безнең кулдан һәлак булырсың!» — ди.

²²Шуңа күрә Күкләр Хуҗасы Раббы алар турында болай ди: «Мин аларны җәзага тартачакмын — егетләре кылычтан узачак, ә угыл вә кызлары ачтан үләчәк!

²³Җәза бирәсе елны Мин Анатот халкына афәт җибәрәчәкмен — аларның берсе дә исән калмаячак!»