Read Изге Язма, 2015 Иремия 21 Bible Online

Иремия 21 - Изге Язма, 2015 bible

Иремия 21

¹ 1-3 Сәдыкыйя патша, түбәндәге сүзләрне җиткерер өчен, Иремия янына Малкия углы Пашхурны һәм Магасея углы рухани Сефанияне җибәрде: — Безнең өчен Раббыдан үтенеп сора әле, чөнки Бабил патшасы Нәбухаднессар [39] безгә каршы яуга кузгалды; бәлки, Раббы, әүвәлгечә могҗиза кылып, Нәбухаднессарны чигенергә мәҗбүр итәр. Шунда Раббы сүзе Иремиягә ирешеп, ул болай дип җавап бирде: — Сәдыкыйягә җиткерегез:

⁴«Раббы, Исраил Алласы, болай дип әйтә: „Менә, диварларыгызны камалышта тоткан Бабил патшасына — килданиләргә каршы сугыша торган коралларыгызны үзегезгә таба борырмын, шул коралларыгызны шәһәр уртасына өеп куярмын;

⁵кодрәтле кулымны сузып, ачу вә ярсу, зур нәфрәт белән Мин сезгә каршы Үзем сугышырмын;

⁶бу шәһәрдә яшәүче барча җан иясен: кешеләрне дә, мал-туарны да коточкыч үләт зәхмәтенә дучар итәрмен!

⁷Шуннан соң, — дип белдерә Раббы, — Яһүдә патшасы Сәдыкыйяне, аның хезмәтчеләрен һәм шәһәрдә үләт зәхмәтеннән, кылычтан вә ачлыктан исән калган барча халыкны Бабил патшасы Нәбухаднессарга — аларны кырып бетерергә теләгән дошманнары кулына тапшырырмын. Патша аларны кызганмас та, рәхим-шәфкать тә күрсәтмәс, аямас та — һәммәсен кылычтан уздырыр“».

⁸Халыкка син, Раббы болай дип әйтә, диген: «Мин сезгә ике юл бирәм — яшәү яки үлемне сайлагыз!

⁹Шәһәрдә калганнар кылычтан, ачлыктан вә үләт зәхмәтеннән һәлак булачак; ә шәһәрне камалышта тоткан дошманнары кулына бирелгән кешеләр исән калачак — аларга тормыш бүләк ителәчәк.

¹⁰Бу шәһәргә яхшылык кылыр өчен түгел, зыян китерер өчен йөзем белән борылдым Мин, — дип белдерә Раббы. — Шәһәр Бабил патшасы кулына тапшырылачак, һәм патша аңа ут салачак».

¹¹Яһүдә патшасының йорт-гаиләсенә шуны җиткер: «Раббы сүзен тыңлагыз!

¹²И Давыт патша нәселе, Раббы сезгә болай ди: „Һәр иртәдә хөкемегез гадел булсын, җәбер күрүчене залим [40] кулыннан йолып алыгыз, югыйсә явыз эшләрегезне күреп, ярсуым уттай кабыныр, беркем сүндерә алмаслык булып дөрләр.

¹³И Иерусалим, үзәндәге тау өстендә урнашкан кала, Мин сиңа каршы чыгамын! — дип белдерә Раббы. — Сез: ‘Безгә каршы кем чыга алыр, яшәгән урыныбызга кем керә алыр?!’ — дисез.

¹⁴Ләкин Мин сезгә җәзаны кылган гамәлләрегезгә карап бирермен! — ди Раббы, — Урманыгызда ут дөрләтермен, ул ут тирә-яктагы бар нәрсәне яндырып юк итәр“».