Read Изге Язма, 2015 Кайгы җыры 5 Bible Online

Кайгы җыры 5 - Изге Язма, 2015 bible

Кайгы җыры 5

¹Безнең белән булган хәлләрне исеңә төшер, Раббым; карап бак һәм хурлыгыбызны күр:

²биләмә җиребез — читләргә, йортларыбыз ят кешеләргә күчте.

³Без атасыз, ятимнәр булып калдык, аналарыбыз — тол хатыннар хәзер.

⁴Суыбызны да көмеш түләп эчәбез, утыныбызны да акчага сатып алабыз.

⁵Эзебезгә басып, эзәрлекләп киләләр безне, тәмам хәлдән тайдык, бернинди ял күрмибез.

⁶Туйганчы ашарлык икмәк табар өчен, кулларыбызны мисырлыларга, ашшурлыларга сузабыз.

⁷Гөнаһ кылган ата-бабаларыбыз инде юк, ә без аларның җинаятьләре өчен җәза кичерәбез.

⁸Безнең өстән коллар хакимлек итә. — Алар кулыннан безне кем йолып алыр?!

⁹Икмәк юнәтеп, җаныбызны хәвеф астына куябыз, чөнки чүлдән безгә кылыч яный.

¹⁰Ачлык газабыннан тән тиребез мичтә кызгандай каралып күмерләнде.

¹¹Хатыннарны — Сионда, кызларны Яһүдә шәһәрләрендә мәсхәрәлиләр.

¹²Түрә-хакимнәребезне дошман асып куйды, өлкәннәргә сан бетте.

¹³Егетләр тегермәндә он тартырга мәҗбүр, яшүсмерләр абына-абына утын ташый.

¹⁴Өлкәннәр инде шәһәр капкасы төбендә утырмый, егетләр көй уйнамый.

¹⁵Йөрәгебезнең шатлыгы сүнде, биюләребез кайгы җырына әверелде.

¹⁶Башыбыздан таҗ төште. Гөнаһ кылдык без! Кайгы безгә!

¹⁷Шунлыктан йөрәгебез әрни, күзләребезнең нуры сүнде.

¹⁸Сион тавы бушап калды, анда чүл бүреләре эзләнеп йөри.

¹⁹Ләкин Синең хакимлегең, Раббы, — мәңгелектер, Синең тәхетең буыннан-буыннаргача дәвам итәдер!

²⁰Тик нигә Син безне болай бөтенләйгә оныттың? Ник безне шулай озакка ташладың?

²¹Безне Үзеңә кайтар, Раббы, һәм без кайтырбыз! Электәге көннәребезне кайтар!

²²Син безне бөтенләйгә кире кактыңмы? Безгә булган ачуың шулай чиксезме?