Read Изге Язма, 2015 Яхәзкыл 30 Bible Online

Яхәзкыл 30 - Изге Язма, 2015 bible

Яхәзкыл 30

¹Миңа тагын Раббы сүзе килеп иреште:

²— И адәм углы! Пәйгамбәрлек итеп әйт, Хуҗа-Раббы болай дип әйтә, диген: «„Нинди бәхетсез көн!“ — дип, үкереп елагыз!

³Чөнки Раббының караңгы, төксе көне инде бик якын — халыкларга кайгылы ел җитеп килә.

⁴Мисыр өстенә кылыч килә; җаннары кыелганнар егыла башлагач, Мисырның байлыгы талангач, нигезләре җимерелгәч, хәбәшиләрнең коты алыначак.

⁵Хәбәшстан, Пут, Луд, гарәпләрнең бар җирләре, Луб [15] һәм Килешү җирендәге угыллар [16] мисырлылар белән бергә кылычтан узачак».

⁶Раббы болай дип әйтә: «Мисырның терәүләре җимереләчәк, аның горур егәре бетәчәк; Мигдолдан алып Севенегә кадәр байтаклар кылычтан үләчәк, — дип белдерә Хуҗа-Раббы. —

⁷Бушап калган җирләр арасында ул да бушап калачак, шәһәрләре дә бушап калган шәһәрләр арасында булачак.

⁸Мисырга ут салгач, аның бөтен терәүләре җимерелгәч, Минем Раббы икәнемне беләчәкләр.

⁹Ул көндә, ваемсыз хәбәшиләрне куркытыр өчен, Минем хәбәрчеләрем корабларда юлга чыгачак. Мисырның һәлакәтле көнендә аларның коты алыначак, чөнки ул көн инде килә».

¹⁰Хуҗа-Раббы болай дип әйтә: «Бабил патшасы Нәбухаднессар кулы белән күп санлы Мисыр халкын киметәм.

¹¹Нәбухаднессар үзе һәм башкалар арасында иң рәхимсезе саналган халкы бу җирне һәлак итәр өчен киләчәк, кылычларын Мисырга каршы юнәлтеп, җирне мәет белән тутырачак.

¹²Елга-култыкларны корытып, Мисыр җирен Мин явызлар кулына бирәм, чит халыклар кулы белән бу җирне, андагы бар нәрсәне тар-мар итәм». Моны Мин, Раббы, әйттем.

¹³Хуҗа-Раббы болай дип әйтә: «Потларны җимерәм, Мемфиста [17] ялган илаһларны юк итәм, Мисыр җирендә инде хакимнәр булмас, Мин Мисыр җиренең котын алам.

¹⁴Патросны бөлдерәм, Соганга ут салам, Фивага [18] җәза бирәм.

¹⁵Ярсуымны Мисыр кальгасы Пелүсимгә [19] түгәм, Фиваның күп санлы халкын юк итәм.

¹⁶Мисырга ут салам; Пелүсимне газапка дучар итәм. Дошманнары Фивага һөҗүм итәр, көндезен Мемфиска ябырылыр.

¹⁷Он [20] белән Пи-Бәсетнең яшь егетләре кылычтан һәлак булыр, шәһәр халкы әсир төшәр.

¹⁸Мисырның камыты сынып, аның горур егәре беткәч, Тахпанхеста көн сүрелеп калыр. Аны болыт каплап алыр, кызлары әсир ителер.

¹⁹Мисырга җәзам шул булыр, һәм алар Минем Раббы икәнемне белерләр».

²⁰Унберенче елда, беренче айның җиденче көнендә миңа Раббы сүзе килеп иреште:

²¹— И адәм углы! Мин Мисыр патшасы фиргавенне җиңдем; савыксын өчен, аны дәваламадылар, тернәкләнеп, кулына кылыч тотарлык булсын өчен, яраларын бәйләмәделәр.

²²Шуңа күрә Хуҗа-Раббы болай дип әйтә: «Менә, Мин Мисыр патшасы фиргавенгә каршы чыгам, аның җәрәхәтле һәм дә таза кулын да яралыйм, кулыннан кылычын сугып төшерәм.

²³Мисырлыларны төрле халыклар арасына сибеп, чит-ят җирләргә таратам.

²⁴Ә Бабил патшасының кулын нык итәм, аның кулына кылыч салам, фиргавеннең кулын исә яралыйм, һәм ул авыр җәрәхәтләрдән Бабил патшасы алдында ыңгырашып торыр.

²⁵Бабил патшасының кулын ныгытам, фиргавеннең кулы исә көчсезләнәчәк. Бабил патшасының кулына Мин кылыч салып, Мисыр җиренә ул яу белән килгәч, Минем Раббы икәнемне белерләр.

²⁶Мисырлыларны Мин төрле халыклар арасына сибәм, чит-ят җирләргә таратам; шунда Минем Раббы икәнемне белерләр».