Read Изге Язма, 2015 Яхәзкыл 40 Bible Online

Яхәзкыл 40 - Изге Язма, 2015 bible

Яхәзкыл 40

¹Сөргенгә китүебезнең егерме бишенче елы башлануга, айның унынчы көнендә [24] (шәһәр җимерелгәннең ундүртенче елында) мин үз өстемдә Раббының кулын тойдым, һәм Ул мине Исраилгә күчерде.

²Аллаһыдан ирешкән күренешләрдә Ул мине, Исраил җиренә китереп, бик биек тау башына бастырып куйды. Тауның көньяк битләвендә шәһәр йортларына охшаган биналар күрдем.

³Аллаһы мине шунда китереп, мин капка янында басып торган бер ир-атны күрдем; ул бакыр сыман ялтырап тора һәм аның кулында үлчи торган киндер бау белән үлчәү таягы бар иде.

⁴Ул миңа: — И адәм углы! Күзләрең белән күр һәм колакларың белән ишет, сиңа күрсәткән нәрсәләрнең һәммәсен күңелеңә салып куй, чөнки син монда шуның өчен китерелдең; бар күргәнеңне Исраил халкына җиткер, — диде.

⁵Шунда мин Изге йортның ишегалдын уратып алган диварны күрдем. Теге ирнең кулындагы үлчәү таягы алты терсәккә тәңгәл булып, әлеге терсәк бер уч киңлеген өстәп санала иде [25]. Ир диварны үлчәде — аның калынлыгы да, биеклеге дә бер таякка тәңгәл булды.

⁶Аннары ул көнчыгышка караган капка янына китте, баскычтан менеп, капканың бусагасын үлчәде — аның калынлыгы бер таяк булды.

⁷Капка диварларындагы сакчы куышларының буе һәм иңе бер таяк булып, куышлар арасы биш терсәк иде. Эчке яктан болдыр янындагы капка бусагасы бер таяк киңлектә иде.

⁸Ир кеше капка янындагы болдырны үлчәде —

⁹киңлеге сигез терсәк, ә баганаларының калынлыгы ике терсәк булды. Бу капка болдыры Изге йортка караган якта иде.

¹⁰Көнчыгыш капканың диварларында һәр ике яклап өчәр куыш эшләнгән; аларның өчесе дә бер зурлыкта; һәм һәр ике яктагы диварлар да бер озынлыкта иде.

¹¹Аннары ул капка уемын үлчәде — аның киңлеге ун терсәк, ә капка киңлеге унөч терсәк иде.

¹²Алгы яктан һәр куышны бүлеп алган киртәнең биеклеге вә калынлыгы бер терсәк; куышларның һәр ягы алты терсәккә тәңгәл.

¹³Аннары ул бер куышның арткы диварыннан каршы яктагы куышның арткы диварына кадәр үлчәде — ул ара егерме биш терсәк булды.

¹⁴(Шулай ук ишегалдына чыга торган болдырны үлчәп, шундагы капка диварының биеклеге алтмыш терсәк тәшкил итте [26].)

¹⁵Капка уемыннан алып болдырның аргы башына кадәр илле терсәк булды.

¹⁶Сакчылар куышының арткы диварында, куышлар арасындагы диварда һәм болдырның һәр ике ягында капкачлы тәрәзәләр булып, куышлар арасындагы диварларга хөрмә агачы сурәтләре төшерелгән иде.

¹⁷Аннары әлеге ир мине тышкы ишегалдына алып керде. Ишегалдын әйләндереп алган диварлар буйлап эчке яктан басма эшләнгән булып, басмада утыз бүлмә урнашкан иде.

¹⁸Капкаларның һәр ике ягындагы тәбәнәгрәк басманың киңлеге капка озынлыгы белән бер иде.

¹⁹Тышкы капканың эчке ягыннан эчкәре капканың тышкы ягына кадәр йөз терсәк булды; көнчыгыш һәм төньяк тарафта да шулай ук иде.

²⁰Аннары ул тышкы ишегалдына керә торган төньяк капканың озынлыгын вә киңлеген үлчәде.

²¹Аның һәр ике ягындагы өчәр сакчы куышы, алар арасындагы диварлар һәм болдыр беренче капканыкы кебек иде. Капка диварларының озынлыгы илле, ә аларның арасы егерме биш терсәк булып,

²²андагы тәрәзәләр, болдыр, хөрмә агачы сурәтләре көнчыгыш капканыкы кебек иде; капкага җиде басмалы баскыч алып менә, ә аргы башта болдыр урнашкан.

²³Көнчыгыш һәм төньяк капкалар каршында эчке ишегалдына керә торган капкалар бар; теге ир әлеге капкалар арасын үлчәде — ул йөз терсәк булды.

²⁴Шуннан соң ул мине көньякка таба алып китте, анда көньяк капка бар иде; ул аның баганаларын вә болдырын үлчәде, алар да шундый ук зурлыкта иде.

²⁵Капка диварлары һәм болдыр тәрәзәләре башка капкаларныкы кебек иде; капка диварларының озынлыгы илле, ә аларның арасы егерме биш терсәк булып,

²⁶аңа җиде басмалы баскыч алып менә, ә аргы башта болдыр урнашкан. Әлеге диварлар хөрмә агачы сурәтләре белән бизәлгән.

²⁷Эчке ишегалдының көньягында да капка бар иде, һәм теге ир шушы капка белән көньяктагы тышкы капка арасын үлчәде — ул йөз терсәк булды.

²⁸Ул мине көньяк капкадан эчке ишегалдына алып керде һәм көньяк капканы үлчәде — ул да башка капкалар кебек үк иде.

²⁹Аның сакчылар өчен куышлары, куышлар арасындагы диварлары һәм болдыры башка капкаларныкына охшаш, капка диварларында вә болдырында һәр яклап тәрәзәләр бар иде. Капка диварларының озынлыгы — илле терсәк, ә аларның арасы — егерме биш терсәк.

³⁰(Эчке ишегалдындагы һәр капка болдырының киңлеге — егерме биш терсәк, ә озынлыгы биш терсәк иде.)

³¹Әлеге капканың болдыры тышкы ишегалдына карый, баганаларында хөрмә агачы сурәтләре бар; анда сигез баскычтан менәсе.

³²Шуннан соң ул мине көнчыгыш капкадан эчке ишегалдына алып керде һәм капканы үлчәде — анысы да башка капкалар сыман иде.

³³Аның сакчылар өчен куышлары, куышлар арасындагы диварлары һәм болдыры башка капкаларныкына охшаш, капка диварларында вә болдырында һәр яклап тәрәзәләр бар. Капка диварларының озынлыгы — илле терсәк, ә аларның арасы — егерме биш терсәк.

³⁴Әлеге капканың болдыры тышкы ишегалдына карый, як-ягындагы баганаларда хөрмә агачы сурәтләре бар; анда сигез баскычтан менәсе иде.

³⁵Аннары ул мине төньяк капкага алып килде һәм аны үлчәде — ул да башка капкалар сыман иде.

³⁶Аның сакчылар өчен куышлары, куышлар арасындагы диварлары, болдыры һәм як-яктагы тәрәзәләре башка капкаларныкына охшаш иде. Капка диварларының озынлыгы — илле терсәк, ә аларның арасы — егерме биш терсәк.

³⁷Әлеге капканың болдыры тышкы ишегалдына карый, як-ягындагы баганаларда хөрмә агачы сурәтләре бар; анда сигез баскычтан менәсе иде.

³⁸Капка болдырында ишекле бүлмәләр булып, анда тулаем яндыру корбаннарын юалар иде.

³⁹Болдырның һәр ике ягында икешәр өстәл тора, аларда тулаем яндыру корбаны, гөнаһ йолу корбаны, гаеп йолу корбаны чалалар иде.

⁴⁰Капка болдырының тышкы ягында, төньяк капкага керү юлында, ике яклап икешәр өстәл куелган.

⁴¹Капканың эчендә-тышында һәр яклап дүртәр өстәл булып, корбан чалу өчен барлыгы сигез өстәл тора иде.

⁴²Тулаем яндыру корбаны өчен шомартылган таштан буе вә иңе бер терсәк ярым, биеклеге бер терсәк булган дүрт өстәл ясалып, аларның өстенә тулаем яндыру корбаны һәм бүтән корбаннар чалу өчен кирәкле әйберләр куела иде.

⁴³Диварларга уч киңлегендәге ыргаклар беркетелгән, ә өстәлләргә корбан ите салына иде.

⁴⁴Эчке ишегалдында, эчкәре капка янәшәсендә ике бүлмә булып, аларның төньяк капка янындагысы — көньякка, ә көньяк капка янындагысы төньякка карый иде.

⁴⁵Теге ир миңа: — Көньякка караган бу бүлмә — Изге йортта хезмәт итүче руханилар өчен;

⁴⁶ә төньякка караганы мәзбәх тирәсендә хезмәт итүче руханилар өчен тәгаенләнгән. Әлеге руханилар — Садыйк нәселеннән булып, Раббыга хезмәт итәргә лаек булган бердәнбер левиләр, — диде.

⁴⁷Аннары ул дүртпочмаклы эчке ишегалдын үлчәде — аның иңе йөз, озынлыгы да йөз терсәк булды. Мәзбәх исә шунда, Изге йортның каршысында урнашкан иде.

⁴⁸Ул мине Изге йорт болдырына алып керде һәм капканы тотып торучы диварларны үлчәде — алар һәрьяклап бишәр терсәк калынлыкта булды. Капканың уемы — ундүрт терсәк, ә капка урнашкан ян-яктагы диварлар өчәр терсәк иде.

⁴⁹Болдырның озынлыгы — егерме, киңлеге — унике терсәк; аңа ун баскычтан менәсе; капканың уң һәм сул ягына берешәр багана куелган.