Read Изге Язма, 2015 Яхәзкыл 41 Bible Online

Яхәзкыл 41 - Изге Язма, 2015 bible

Яхәзкыл 41

¹Аннары теге ир мине Аллаһы йортының алгы бүлмәсенә алып керде һәм ишек янындагы диварларны үлчәде — һәр ике яктан да аларның калынлыгы алты терсәк иде.

²Ишекнең уемы ун терсәк булып, һәр ике ягындагы диварларның озынлыгы бишәр терсәк иде; аннары ул алгы бүлмәне үлчәде — аның озынлыгы кырык терсәк, киңлеге егерме терсәк булды.

³Шуннан ул эчке бүлмәгә үтте, ишек янындагы диварларны үлчәде — аларның калынлыгы ике терсәк иде. Ишекнең уемы алты терсәк булып, һәр ике ягындагы диварларның озынлыгы җиде терсәк иде.

⁴Аннары озынлыгы вә киңлеге егерме терсәк булган эчке бүлмәне үлчәп алды һәм миңа: — Бу — Иң изге бүлмә, — диде.

⁵Аллаһы йорты диварының калынлыгы — алты, ә дивар тирәли урнашкан ян бүлмәләрнең киңлеге дүртәр терсәк булды.

⁶Ян бүлмәләр берсе өстендә берсе өчәр рәт урнашып, һәр рәттә утызар бүлмә иде. Изге йорт дивары буйлап ясалган чыгынтылар ян бүлмәләргә терәк буларак хезмәт итә; шулай итеп, бүлмәләр йорт диварына терәлеп тормый иде.

⁷Һәр рәттәге ян бүлмәләр аскысыннан киңрәк итеп эшләнгән. Изге йортны әйләндереп алган әлеге бүлмәләр өскә таба киңәя бара. Түбәндәге рәттән өске рәткә урта рәт аша баскыч буйлап менәсе.

⁸Һәм мин Изге йорт нигезенең күтәртебрәк эшләнгән булуын һәм аның ян бүлмәләр өчен нигез вазифасын башкаруын күрдем. Нигезнең биеклеге бер таякка — тулы алты терсәккә тәңгәл иде.

⁹9-11 Ян бүлмәләрнең тышкы дивар калынлыгы биш терсәк иде. Ян бүлмәләр белән рухани бүлмәләре арасында, Изге йорт тирәли, киңлеге егерме терсәккә тәңгәл ачык урын булып, ян бүлмәләргә төньяктан һәм көньяктан шул ачык урын аша керәсе. Изге йортның нигезе диварлардан биш терсәккә алгарак чыгып тора.

¹²Изге йортның көнбатышындагы ачык урынга караган бинаның киңлеге — җитмеш, озынлыгы — туксан, ә бина диварларының калынлыгы биш терсәк иде.

¹³Аннары теге ир Изге йортның озынлыгын үлчәде — ул йөз терсәк булды. Көнбатыштагы ачык урын белән шушы бинаның киңлеге дә диварлары белән бергә шулай ук йөз терсәк иде.

¹⁴Изге йорт ишегалдының көнчыгышка караган ягы, шундагы бүлеп алынган ачык урынны да кертеп, йөз терсәк киңлектә иде.

¹⁵Ул ир Изге йорт артындагы ачык урынга караган бинаны үлчәде: әлеге бинаның озынлыгы ике яктагы әйваннары [27] белән бергә йөз терсәк булды. Аллаһы йортының эчке бүлмәләре, ишегалдына чыга торган болдыр,

¹⁶16-18 бусагалар, тар тәрәзәләр, бүлмәләрнең өчесен дә уратып алган ян бүлмәләр — агачтандыр. Идән, Аллаһы йорты диварының тәрәзәгә кадәр өлеше, ишектән югары өлеше, тәрәзәләрнең эчке вә тышкы ягы да агачтан эшләнгән. Эчке һәм алгы бүлмә диварлары тоташтан керубим вә хөрмә агачы сурәтләре белән уеп бизәлгән: хөрмә агачы һәм керубим сурәтләре чиратлашып килә. Һәр керубимнең ике йөзе булып,

¹⁹бер яктагы хөрмәгә караган йөзе — кешенеке, ә икенче яктагы хөрмәгә караганы арысланныкы иде. Изге йортның бөтен диварлары шулай эшләнгән иде.

²⁰Керубим вә хөрмә агачы сурәтләре диварларны шулай идәннән алып ишек өстенә кадәр бизәп тора иде.

²¹Аллаһы йортының ишек яңаклары дүртпочмаклы булып, Иң изге бүлмәнеке дә нәкъ шундый иде.

²²Биеклеге өч терсәк, озынлыгы ике терсәк булган мәзбәх — аның мөгезләре, нигезе, ян яклары — агачтан эшләнгән. Теге ир миңа: — Бу — Раббы алдындагы өстәл, — диде.

²³Аллаһы йортына, Иң изге бүлмәгә керә торган ишекләр ике ишекчәле иде.

²⁴Һәр ишек икешәр ишекчәдән гыйбарәт, һәр ишектә — күгәнгә эленгән ике ишекчә.

²⁵Аллаһы йорты ишекләренә, диварлардагы кебек үк, керубимнәр вә хөрмә агачы сурәтләре уелган. Болдыр алдындагы түбә такта белән ябылган.

²⁶Болдырның ян-якларында тар тәрәзәләр ясалган булып, аның түшәменә һәм диварларның һәр икесенә, шулай ук йортның ян бүлмәләренә хөрмә агачы сурәтләре уелган иде.