Read Изге Язма, 2015 Һошея 1 Bible Online

Һошея 1 - Изге Язма, 2015 bible

Һошея 1

¹Яһүдә җирендә берсе артыннан берсе Уззия, Иотам, Әхәз вә Хизәкыйя исемле патшалар, Исраилдә исә Яһоаш углы Яробам патша хакимлек иткән заманда Беэри углы Һошеягә Раббыдан вәхи [1] иреште.

²Һошеягә сүзен башлап, Раббы аңа: — Бар, үзеңә бер уйнашчы хатын һәм аның зинадан туган балаларын да ал, — диде.

³Шулай итеп, Һошея үзенә хатынлыкка Диблаим кызы Гамәрне алды, һәм ул, авырга калып, аңа бер ир бала тапты.

⁴Аннары Раббы Һошеягә: — Балага Изрегыл дип исем куш, чөнки тиздән Мин Изрегылда [2] түгелгән кан өчен Еһү йортын җәзага тартачакмын һәм Исраил йортының патшалык итүенә чик куячакмын.

⁵Ул көнне Мин Изрегыл үзәнендә Исраилнең җәясен сындырачакмын, — диде.

⁶Гамәр, тагын авырга калып, кыз бала тапты. Раббы Һошеягә: — Балага Ло-Рухама [3] дип исем куш; чөнки Мин, Исраилне рәхим-шәфкатемнән аерып, аны инде кичермәячәкмен.

⁷Яһүдә йортын исә рәхмәтемнән ташламам: аны җәя-кылыч, сугыш яисә ат-җайдаклар илә түгел, бәлки Раббы Алла кулы белән коткарырмын, — диде.

⁸Ло-Рухаманы күкрәктән аерганнан соң, хатын, янә авырга калып, ир бала тапты.

⁹Раббы Һошеягә: — Аңа Ло-Амми [4] дип исем куш, — диде, — чөнки сез Минем халкым түгел, Мин дә сезнең Аллагыз түгелмен.

¹⁰Әмма шулай да исраилиләрнең саны диңгез комыдай үлчәп тә, исәпләп тә бетергесез булачак. Һәм аларга: «Сез Минем халкым түгел», — дип әйтелгән урында: «Сез — тере Аллаһының балалары», — диячәкләр.

¹¹Яһүдә вә Исраил угыллары, берләшеп, үзләренә бер юлбашчы сайлап куярлар һәм бу җирдән чыгып китәрләр. Әйе, Изрегылның [5] алдагы көне бөектер!