Read Изге Язма, 2015 Йоил 3 Bible Online

Йоил 3 - Изге Язма, 2015 bible

Йоил 3

¹Менә шул көннәрдә, шул вакытта, Яһүдә белән Иерусалимне әсирлектән коткаргач,

²Мин, бар халыкларны җыеп, Хөкем үзәненә китерермен һәм аларны Үземнең милкем Исраилгә каршы кылган гамәлләре өчен хөкемгә тартырмын, чөнки алар Минем халкымны төрле кавемнәр арасына тараттылар, җиремне үзара бүлгәләп бетерделәр,

³халкымны жирәбә салып бүлгәләделәр, фахишәләргә түләр өчен — ир балаларны, шәраб алып эчәр өчен, кыз балаларны коллыкка саттылар.

⁴Әй Сур вә Сидун каласы, әй Пелешет җирендәге барлык өлкәләр, ни кылмакчы буласыз сез Миңа? Үч кайтармакчымы, Миннән үч алмакчымы сез? Кылган гамәлләрегезне Мин кичекмәстән үз башыгызга кайтарырмын!

⁵Чөнки сез Минем алтын-көмешемне, бар хәзинәмне тартып алып гыйбадәтханәләрегезгә куйдыгыз.

⁶Яһүдә вә Иерусалим угылларын сез, үз җирләреннән сөреп, яванлыларга саттыгыз.

⁷Әмма Мин аларны сез сатып җибәргән урыннан кайтарырмын һәм сез аларга кылганны үзегезгә кылырмын:

⁸угыл-кызларыгызны яһүдиләргә сатармын, алар исә еракта яшәүче шебалыларга сатып җибәрер, — дип әйтте Раббы. —

⁹Бар халыкларга игълан итегез: „Сугышка әзерләнегез, яугирләрегезне [4] орышка чакырыгыз — бөтен сугышчылар күтәрелеп чыксын.

¹⁰Сукадан — кылыч, урактан сөңге очлыклары коегыз. Иң көчсезе дә: ‘Мин көчле!’ — дип әйтсен.

¹¹Әй тирә-яктагы халыклар, ашыгыгыз, бергә тупланыгыз!“» Йа Раббым, батыр угылларыңны шунда алып бар!

¹²«Халыклар, күтәрелеп, Хөкем үзәненә җыелсыннар, чөнки Мин, тирә-яктан җыелган барлык халыкларны хөкем итәр өчен, шунда килеп утырачакмын», — ди Раббы.

¹³Уракларыгызны эшкә җигегез, чөнки игеннәр өлгерде; йөзем таптарга барыгыз, чөнки йөзем изгечләр җимеш белән мөлдерәмә; йөзем суы тулып аккан кебек, халыкларның явызлыгы баштан ашкан.

¹⁴Хөкем үзәне халык белән тулы! — Хөкем үзәненә Раббы көне якынлаша!

¹⁵Кояш вә ай тоныкланыр, йолдызларның нуры сүнәр.

¹⁶Раббы, Сионнан торып, Үз сүзен белдерер, Иерусалимнән Үз тавышын җиткерер — күк тә, җир дә калтырап торыр. Әмма Раббы Үз халкын сыендырыр, исраилиләрне яклап калыр.

¹⁷«Шул чагында сез Раббы икәнемне, Үземнең изге тавым Сионда яшәвемне белерсез, — ди Раббы. — Иерусалим изге урын булыр, чит кавемнәр инде аның аша үтә алмас.

¹⁸Шундый көн килер: таулардан шәраб саркып, калкулыклардан сөт елгалары агып торыр, Яһүдә иленең бөтен елгалары су белән тулыр; Раббы йортыннан чишмә агып чыгып Шиттим үзәненә [5] су биреп торыр.

¹⁹Яһүдә угылларын кыерсыткан, аның җирендә гаепсезгә кан түккән өчен, Мисыр — чүлгә, Эдом буш далага әйләнер.

²⁰Яһүдә вә Иерусалим исә мәңге, буыннан-буыннаргача яшәр.

²¹Мин аларның каннары өчен гаеплеләрдән үч алырмын, кичермәм! Мин, Раббы, һәрвакыт Сионда яшәрмен».