Read Изге Язма, 2015 Амос 1 Bible Online

Амос 1 - Изге Язма, 2015 bible

Амос 1

¹Тыкуа терлекчеләренең берсе булган Амос сүзләре. Җир тетрәвенә ике ел кала, Яһүдәдә — Уззия, Исраилдә Йогаш углы Яробам патшалык иткән көннәрдә, Амоска Исраил хакында вәхи [1] иңде.

²Амос болай дип сөйләде: «Раббы Сионнан торып күкрәр, гөрелтесен Иерусалимнән яңгыратыр — шиңәр шулчак көтүлек җирләре, корып кибәр Кәрмил тау башлары».

³Раббы болай ди: «Җинаять өстенә җинаять эшләгән, Гилыгадны [2] тимер чабагачлар белән суктырган Дәмәшкъне җәзасыз калдырмам:

⁴Хазаилнең [3] сараен утка чорнармын, Бен-Һададның [4]кальгаларын ялкын ялмап алыр.

⁵Дәмәшкънең капка бикләрен ватармын, Авен үзәнендә [5] яшәүчеләрне һәм Бәйт-Эдендагы [6]хөкемдарлык таягының иясен юк итәрмен; арамиләр Кыйрга [7] сөрелер», — ди Раббы.

⁶Раббы болай ди: «Җинаять өстенә җинаять эшләгән, халкымны авылы-авылы белән Эдомга [8] әсирлеккә сатып җибәргән Газаны җәзасыз калдырмам:

⁷Газа диварларын утка чорнармын, аның кальгаларын ялкын ялмап алыр.

⁸Ашдодта яшәүчеләрне һәм Ашкылундагы хөкемдарлык таягының иясен юк итәрмен; кулымны Экронга [9] каршы сузармын, һәм пелештиләр соңгы кешесенә кадәр һәлак булыр!» — ди Хуҗа-Раббы.

⁹Раббы болай ди: «Җинаять өстенә җинаять эшләгән, кардәшлек килешүен онытып, халкымны авылы-авылы белән Эдомга сатып җибәргән Сурны [10] җәзасыз калдырмам:

¹⁰Сур диварларын утка чорнармын, аның кальгаларын ялкын ялмап алыр».

¹¹Раббы болай ди: «Җинаять өстенә җинаять эшләгән, рәхим-шәфкать белмичә, кылычын күтәреп, кардәшен эзәрлекләгән, ачуы һаман дөрләп, ярсуы һаман янып торган Эдомны җәзасыз калдырмам:

¹²Теманны [11] утка чорнармын, Босра [12] кальгаларын ялкын ялмап алыр».

¹³Раббы болай ди: «Җинаять өстенә җинаять эшләгән, үз илләренең чикләрен киңәйткән чакта, Гилыгадта йөкле хатыннарның карыннарын ярган аммониләрне җәзасыз калдырмам:

¹⁴Рабаһның [13] диварларына ут салырмын, ялкын ялмап алыр аның кальгаларын — ул көн сугыш гөрелтесе астында, давыллы көндә купкан өермә эчендә узар.

¹⁵Патшалары сөрген китәр, аның түрә-идарәчеләре дә китәр», — ди Раббы.