Read Изге Язма, 2015 Амос 2 Bible Online

Амос 2 - Изге Язма, 2015 bible

Амос 2

¹Раббы болай ди: «Җинаять өстенә җинаять эшләгән, Эдом патшасының сөякләрен яндырып, көл-тузанга әйләндергән Мәабны [14] җәзасыз калдырмам:

²Мин аны утка чорнармын, Кыръют [15] кальгаларын ялкын ялмап алыр — чуалыш эчендә, сугыш гөрелтесе, быргы тавышлары астында Мәаб һәлак булыр.

³Аның хөкемдарын да, түрә-идарәчеләрен дә юк итәрмен», — ди Раббы.

⁴Раббы болай ди: «Җинаять өстенә җинаять эшләгән, Раббы кануныннан ваз кичеп, Аның кагыйдәләрен тотмаган, ата-бабалары табынган ялган потларга ияреп, туры юлдан язган Яһүдәне җәзасыз калдырмам:

⁵Мин аны утка чорнармын, Иерусалим кальгаларын ялкын ялмап алыр».

⁶Раббы болай ди: «Җинаять өстенә җинаять эшләгән Исраилне җәзасыз калдырмам, чөнки тәкъваны алар — бер көмеш, фәкыйрьне бер пар башмак бәрабәренә саталар;

⁷туфрак таптагандай, юксыл-мескеннең башыннан йөриләр, мазлум-бичараны [16] юлыннан этеп чыгаралар; Минем изге исемемне хурлап, бер үк хатын янына ата да, угыл да йөри;

⁸рәһенгә [17] алынган киемне җәеп, мәзбәхләр янында ятып йоклыйлар; үз Аллалары йортында гаепле кешедән түләткән шәрабны эчәләр.

⁹Мин бит сезнең хакка эрбет агачыдай биек, имәндәй көчле-нык амориләрне юк иттем, югарыда үскән җимешләрен, түбәндәге тамырларын корыттым.

¹⁰Амориләр җирен сезгә биләмәгә бирер өчен, Мин бит сезне, Мисыр җиреннән алып чыгып, кырык ел буена чүлдә әйдәп йөрттем;

¹¹угылларыгызны — пәйгамбәр, егетләрегезне нәзир [18] иттем. Шулай түгелме әллә, әй исраилиләр?! — ди Раббы. —

¹²Сез исә нәзирләргә шәраб эчердегез, ә пәйгамбәрләргә пәйгамбәрлек кылмаска боердыгыз.

¹³Әнә шуның өчен Мин сезне көлтә төягән арба белән изгәндәй изәрмен.

¹⁴Җитезнең — качарлык хәле, көчленең егәре булмас, гайрәтле үзенең җанын саклап кала алмас;

¹⁵укчы аягында басып тора алмас, җитез аяклы йөгереп кача алмас, ат менгән җайдак үзенең җанын саклап кала алмас;

¹⁶батыр егетләрнең иң йөрәкле дигәне дә ул көнне коралын ташлап качар!» — ди Раббы.