Read Изге Язма, 2015 Амос 3 Bible Online

Амос 3 - Изге Язма, 2015 bible

Амос 3

¹Әй исраилиләр! Раббының сүзенә колак салыгыз. Мисыр җиреннән алып чыккан бар халыкка төбәп, Ул шуны әйтә:

²«Җир йөзендәге барча халыклар арасыннан Мин фәкать сезне сайлап алдым, шуңа күрә кылган барлык гөнаһларыгыз өчен сезне җавапка тартачакмын!»

³Ике кеше, үзара килешмичә, бергә сәфәр чыгармы?!

⁴Корбанына тап булмаса, урман ешлыгында арыслан үкерерме?! Берни тота алмаган яшь арыслан үзенең өнендә ырылдармы?!

⁵Алдавыч җим куелмаса, җирдә яткан тозакка кош эләгерме?! Тозакка берни эләкмәсә, элмәк җебе тартылырмы?!

⁶Шәһәрдә быргы кычкыртсалар, халыкны курку алмасмы?! Шәһәргә бәла килсә, Раббы кулы белән эшләнмиме бу?

⁷Хактыр: Үзенең колларына — пәйгамбәрләргә — сер-ниятен алдан белдермичә, Хуҗа-Раббы һичбер эш кылмас.

⁸Арыслан үкереп җибәрсә, кем тетрәнмәс?! Хуҗа-Раббы сөйли башласа, пәйгамбәрлек итми кем булдырыр?!

⁹Ашдод һәм Мисыр кальгаларында шуны белдерегез: «Самарея тауларына җыелып, Исраилдәге коточкыч тәртипсезлеккә, андагы җәбер-золымга күз салыгыз!»

¹⁰Раббы әйтә: «Көчләп-талап, кальгаларына хәрәм мал туплаган бу халык гаделлек белән эш итүне белми».

¹¹Шул сәбәпле Хуҗа-Раббы болай ди: «Дошман, бөтен илегезне камап алып, ныгытмаларыгызны вәйран итәчәк, кальгаларыгызны талап бетерәчәк».

¹²Раббы болай ди: «Көтүче, арыслан авызыннан малын коткарырга тырышып та, хайванның ике бәкәленнән яки колагыннан башка һични тартып алалмагандай, Самареядәге исраилиләр дә кәнәфи аягыннан яки ятакның бер почмагыннан башка һични эләктереп кача алмас».

¹³«Тыңлагыз һәм Ягъкуб [19] нәселенә каршы шаһитлык бирегез! — дип белдерә Хуҗа-Раббы, Күкләр Хуҗасы Алла. —

¹⁴Кылган җинаятьләре өчен Исраилне җавапка тарткан көнне Мин Бәйт-Эл каласындагы мәзбәхләрне җимерермен — киселеп, җиргә төшәр мәзбәх мөгезләре!

¹⁵Туздырырмын кышкы һәм җәйге өйләрне, вәйран [20] булыр фил сөяге белән бизәлгән йортлар, харап булыр пулат-сарайлар!» — ди Раббы.