Read Изге Язма, 2015 Юныс 1 Bible Online

Юныс 1 - Изге Язма, 2015 bible

Юныс 1

¹Амиттай углы Юныска Раббы шушы сүзләрне ирештерде:

²— Ниневәгә [1] юл ал, шул бөек шәһәргә барып, халкын кисәт! Чөнки Миңа андагы явызлыклар турында хәбәр килеп иреште.

³Әмма Юныс, Раббыдан качмакчы булып, капма-каршы якка китеп барды. Яфу шәһәренә килеп төшкәч, Таршишка [2] баручы бер корабка юлыкты. Юл бәһасен түләп корабка утырды да, Раббыдан ераграк китү өчен, Таршишка юл тотты.

⁴Ләкин Раббы диңгез өстендә шундый көчле җил кузгатты ки, коточкыч давыл кубып, кораб җимерелер хәлгә килде.

⁵Диңгезчеләрнең котлары алынып, һәммәсе үз илаһына ялварды. Корабны җиңеләйтү өчен, алар йөкне диңгезгә ыргытырга тотындылар. Юныс исә кораб төбенә төшеп ятты да тирән йокыга талды.

⁶Кораб башлыгы, Юныс янына төшеп: — Нишләп йоклап ятасың? Тор! Илаһыңа ялвар! Бәлки, хәлебезгә керер дә, һәлак булмабыз, — диде.

⁷Диңгезчеләр: — Әйдәгез, жирәбә салып белик: бу бәлагә кем аркасында тарыдык икән? — диешә башладылар. Жирәбә салдылар, һәм ул Юныска чыкты.

⁸Шуннан соң Юныска: — Сөйләп бир: бу бәла кем аркасында башыбызга төште? — диделәр. — Шөгылең нинди? Кайдан киләсең? Ватаның кайда? Кайсы халыктан буласың?

⁹— Мин гыйбриләрдән, — дип җавап бирде Юныс. — Диңгезне һәм җирне яраткан Күк Алласына, Раббыга табынамын.

¹⁰Диңгезчеләргә ул Раббыдан качуын да әйтте. Диңгезчеләр бик нык куркуга төштеләр һәм Юныстан: — Ни өчен шулай эшләдең? — дип сорадылар.

¹¹Диңгез тагы да катырак ярсыганга күрә, Юныстан алар: — Диңгез тынсын өчен, сине нәрсә эшләтик? — дип сорадылар.

¹²Юныс: — Тотыгыз да диңгезгә атыгыз мине, — дип җавап бирде. — Шулвакыт диңгез тынар. Мин беләмен: бу коточкыч давылга сез минем аркада эләктегез.

¹³Диңгезчеләр, аның сүзләренә карамыйча, коры җиргә җитү өчен, ишкәкләре белән катырак ишәргә керештеләр, әмма файдасы тимәде, чөнки диңгез ярсый-ярсый дулавын дәвам итте.

¹⁴Раббыга мөрәҗәгать итеп: — Йа Раббы, ялварып сорыйбыз, — диде алар. — Шушы адәмнең җаны өчен һәлак булмасак иде. Безне гаепсез адәмнең үлеме өчен гөнаһлы итмә. Син, Раббы, инде теләгәнеңне эшләдең!

¹⁵Шулай дип, алар Юнысны диңгезгә тотып аттылар — ярсыган диңгез шундук тынычланды.

¹⁶Бу хәлдән соң диңгезчеләр, Раббыдан куркып, Аңа корбан китерделәр һәм нәзерләрен әйттеләр.