Read Изге Язма, 2015 Саннар 2 Bible Online

Саннар 2 - Изге Язма, 2015 bible

Саннар 2

¹Раббы Муса белән Һарунга әйтте:

²— Исраилиләр үзләренең чатырларын үз байрагы һәм үз гаиләсенең тамгасы астында, Очрашу чатыры тирәли билгеле бер ераклыкта корсыннар.

³Изге чатырдан көнчыгышта үз байрагы астында, төркем-төркем булып, Яһүдә ыругы үзенең чатырларын корсын. Яһүдә токымының башлыгы — Амминадаб углы Нахшон.

⁴Аның гаскәрендә җитмеш дүрт мең алты йөз кеше исәпләнә.

⁵Алар белән янәшәдә Исәсхәр ыругы үзенең чатырларын корсын. Исәсхәр токымының башлыгы — Суар углы Нетанел.

⁶Аның гаскәрендә илле дүрт мең дүрт йөз кеше исәпләнә.

⁷Арырак Зәбулун ыругы үзенең чатырларын корсын. Зәбулун токымының башлыгы — Хелон углы Элиаб.

⁸Аның гаскәрендә илле җиде мең дүрт йөз кеше исәпләнә.

⁹Төркемнәргә бүленгән Яһүдә гаскәрендә барлыгы йөз сиксән алты мең дүрт йөз кеше исәпләнә. Юлга чыкканда, беренче булып алар кузгала.

¹⁰Изге чатырдан көньякта үзенең байрагы астында төркемнәргә бүленгән Рубин ыругы үз чатырларын корсын. Рубин токымының башлыгы — Шедур углы Элисур.

¹¹Аның гаскәрендә кырык алты мең биш йөз кеше исәпләнә.

¹²Рубин ыругы янында Шимун ыругы үз чатырларын корып урнашырга тиеш. Шимун токымының башлыгы — Суришаддай углы Шелумиел.

¹³Аның гаскәрендә илле тугыз мең өч йөз кеше исәпләнә.

¹⁴Аннары Гәд ыругы үзенең чатырларын корсын. Гәд токымының башлыгы — Дегуил углы Эльясаф.

¹⁵Аның гаскәрендә кырык биш мең алты йөз илле кеше исәпләнә.

¹⁶Төркемнәргә бүленгән Рубин гаскәрендә барлыгы бер йөз илле бер мең дүрт йөз илле кеше исәпләнә. Юлга алар икенче булып кузгалырга тиеш.

¹⁷Юлга чыкканда, Очрашу чатыры һәм Леви ыругы башка ыругларның уртасында булсын. Урнашкан урыннарында ничек торсалар, күченгәндә дә нәкъ шул тәртиптә — һәр ыруг үз урынында, үз байрагы астында барсын.

¹⁸Изге чатырдан көнбатышта үз байрагы астында төркемнәргә бүленгән Эфраим ыругы үзенең чатырларын корсын. Эфраим токымының башлыгы — Аммиһуд углы Элишама.

¹⁹Аның гаскәрендә кырык мең биш йөз кеше исәпләнә.

²⁰Эфраим ыругы янында Менашше ыругы үзенең чатырларын корып урнашырга тиеш. Менашше токымының башлыгы — Педаһсур углы Гәмәлиил.

²¹Аның гаскәрендә утыз ике мең ике йөз кеше исәпләнә.

²²Алардан арырак Беньямин ыругы үзенең чатырларын корсын. Беньямин токымының башлыгы — Гидеони углы Абидан.

²³Аның гаскәрендә утыз биш мең дүрт йөз кеше исәпләнә.

²⁴Төркемнәргә бүленгән Эфраим гаскәрендә барлыгы бер йөз сигез мең бер йөз кеше исәпләнә. Юлга алар өченче булып кузгалырга тиеш.

²⁵Изге чатырдан төньякта үз байрагы астында төркемнәргә бүленгән Дан ыругы үзенең чатырларын корырга тиеш. Дан токымының башлыгы — Аммишаддай углы Ахигызыр.

²⁶Аның гаскәрендә алтмыш ике мең җиде йөз кеше исәпләнә.

²⁷Дан ыругы янында Ашер ыругы үзенең чатырларын корып урнашырга тиеш. Ашер токымының башлыгы — Өхрән углы Пагиел.

²⁸Аның гаскәрендә кырык бер мең биш йөз кеше исәпләнә.

²⁹Арырак Нәптали ыругы үзенең чатырларын корсын. Нәптали токымының башлыгы — Энан углы Ахира.

³⁰Аның гаскәрендә илле өч мең дүрт йөз кеше исәпләнә.

³¹Дан гаскәрендә барлыгы бер йөз илле җиде мең алты йөз кеше исәпләнә. Юлга алар үз байраклары астында иң соңгы булып кузгалырга тиеш.

³²Шулай итеп, гаиләләре буенча исемлеккә теркәлгән исраилиләрнең саны — алты йөз өч мең дә биш йөз илле.

³³Левиләр исә, Раббы Мусага әмер иткәнчә, башка исраилиләр белән беррәттән исәпкә алынмады.

³⁴Раббы Мусага ничек әмер иткән булса, исраилиләр барысын да шулай эшләделәр: үз байраклары астында, үз чатырлары белән тиешле тәртиптә тезелеп урнаштылар, юлга кузгалганда да, һәркайсы үз кабиләсе, үз гаиләсе белән барды.