Read Изге Язма, 2015 Саннар 24 Bible Online

Саннар 24 - Изге Язма, 2015 bible

Саннар 24

¹Исраилне мөбарәк кылуның Раббы күңеленә хуш килүен күреп, Билгам бу юлы инде ишарә эзләп тормады. Ул, чүлгә карашын ташлап,

²ыруг-ыруг булып урнашкан Исраил угылларын күрде. Шунда Билгамга Аллаһы Рухы иңде;

³һәм Билгам пәйгамбәрлек кылды, әйтте: «Бигур углы Билгам сөйли моны, ачык карашлы кеше сөйли,

⁴Аллаһының сүзләрен ишетүче, Кодрәт иясеннән иңгән күренешләрне кабул кылучы, җиргә капланып яткан чакта да, ачык күргән бәндә сөйли:

⁵„Әй Ягъкуб токымы, синең чатырларың, әй Исраил халкы, синең торакларың нинди гүзәл!

⁶Җәйрәп яткан яшел үзән кебек алар, елга буендагы бакчалар, Раббы утырткан сабур агачлары, су буендагы эрбет агачлары кебек үсәләр.

⁷Аларның чиләкләреннән су ташып торыр, аларның орлыклары суга туеныр. Аларның патшасы Агаг патшадан бөегрәк булачак, һәм аларның патшалыгы күтәреләчәк.

⁸Аллаһы аларны Мисырдан алып чыкты, кыргый үгез мөгезедәй көчле алар. Үзенә дошман булган халыкларны ашап бетерә, сөякләрен сындыра-ваклый һәм уклары белән тар-мар китерә.

⁹Ата арыслан кебек, ана арыслан кебек, җиргә ята алар — арысланны торгызырга кем җөрьәт итсен?! Сезгә фатихасын бирүче — фатихалы булсын, сезгә ләгънәт яудыручы — ләгънәтләнсен!“»

¹⁰Бәлакның Билгамга ачуы чыкты; ул, кулын кулга сугып, Билгамга: — Мин сине дошманнарымны ләгънәт итү өчен чакырдым, ә син менә өченче тапкыр инде аларны фатихалыйсың.

¹¹Күз алдымнан югал! Өеңә кайтып кит! Мин сиңа зур хөрмәт күрсәтергә теләдем, ә Раббы сине ул хөрмәттән мәхрүм итте, — диде.

¹²Билгам Бәлакка әйтте: — Мин синең илчеләреңне:

¹³«Бәлак миңа көмеш вә алтын тулы сараен тәкъдим итсә дә, үз теләгем белән, яхшылык яки яманлык эшләү өчен, Раббы сүзеннән чыга алмыйм. Раббы миңа нәрсә әйтсә, шуны гына сөйләячәкмен», — дип кисәтмәдеммени?!

¹⁴Инде мин үз илемә кайтам, әмма киләчәктә бу халыкның синең халкыңа ни-нәрсә эшләячәген әйтеп куймакчымын.

¹⁵Билгам пәйгамбәрлек кылды, әйтте: «Бигур углы Билгам сөйли моны, ачык карашлы кеше сөйли,

¹⁶Аллаһының сүзләрен ишетүче, Аллаһы Тәгаләдән белем алучы, Кодрәт иясеннән иңгән күренешләрне кабул кылучы, егылып төшкән, ә күзләре ачык булган кеше сөйли:

¹⁷„Мин аны күрәм, әмма бу әле хәзер генә түгел; аңа карыйм, әмма бу әле якын түгел. Ягъкуб токымыннан — йолдыз, Исраил халкыннан хөкемдарлык таягы калкып чыгачак — Ул Мәаб җирен кырып салачак һәм Шет угылларын тар-мар итәчәк;

¹⁸Эдом басып алыначак, Сәгыйрьне дошманнары яулап алачак, ә Исраил үзенең көчен күрсәтәчәк.

¹⁹Ягъкуб токымыннан хаким чыгачак, шәһәрдә котылып калганнарны ул юк итәчәк“».

²⁰Аннары Билгам Амалык халкын күрде һәм пәйгамбәрлек кылды, әйтте: «Халыклар арасында Амалык беренче иде, әмма киләчәктә аны һәлакәт көтә».

²¹Шуннан соң ул, карашын кыниләргә күчереп, пәйгамбәрлек кылды, әйтте: «Синең торагың нык, ояң кыя башына корылган.

²²Әмма Ашшур сине әсирлеккә алып киткәч, Кабил вәйран булачак».

²³Билгам пәйгамбәрлек кылды, әйтте: «И-и, Аллаһы шушы эшләрне гамәлгә ашыргач, кем генә исән калыр икән!

²⁴Киттиләрдән диңгез көймәләре килеп, Ашшурны да, Гыйберны да буйсындырачак, әмма ахыр чиктә үзләре дә һәлак булачак».

²⁵Сөйләп бетергәч, Билгам торды да туган ягына кайтып китте, Бәлак та үз юлы белән китеп барды.